4 чэрвеня, у свята Езуса Хрыста, Найвышэйшага і Вечнага Святара, ў Вышэйшай духоўнай семінарыі ў Гродне адбылося завяршэнне навучальнага года.

17 снежня ў гродзенскі катэдральны касцёл св. Францішка Ксаверыя быў унесены Бэтлеемскі агонь міру, які даставілі харцэры з польска-беларускай мяжы. Менавіта з горада над Нёманам пачалася штогадовая скаўцкая эстафета агню па гарадах і мястэчках Беларусі.

Урачыста прывітаў гэты незвычайны знак біскуп Гродзенскі Аляксандр Кашкевіч. Іерарх адзначыў, што сёлетняя акцыя дзялення агнём, які да нас даходзіць з пячоры ў базыліцы Нараджэння ў Бэтлееме ў Палестыне, адбываецца пад дэвізам “Святло служэння”. 

Біскуп падкрэсліў, што ў гэты цяжкі час, калі ўвесь свет закрануты пандэміяй каранавірусу, a шмат нашых блізкіх перажываюць цярпенні і пачуццё няўпэўненасці, да нас у чарговы раз прыходзіць маленькае Полымя надзеі. 

“Таму сёлета разам з гэтым святлом мы хочам занесці цеплыню Езусавага полымя ў нашы дамы, касцёлы, капліцы, на месцы нашай працы, каб яно асвятляла закуткі памяшканняў, у якіх мы жывём, молімся і працуем, але найперш у чалавечыя сэрцы, гатовыя да прыняцця Езуса і Яго любові”, – дадаў іерарх. 

Пастыр Касцёла на Гродзеншчыне адзначыў, што сёння, як ніколі, нашым братам і сёстрам патрэбна наша cлужэнне, знакам якога з’яўляецца Бэтлеемскае святло міру, наша блізкасць, адвага і сведчанне.

“Несучы Святло з Бэтлеема ў гэтым годзе, дапаможам сабе і іншым перамагчы пачуццё няўпэўненасці, а таксама прычыны страху, які робіць людзей закрытымі. Няхай гэтае маленькае полымя, знак, што “Пан блізка”, запоўніць час чакання нараджэння Бога, які вылечыць, абновіць і ўмацуе чалавецтва, якое прагне сапраўднага збаўлення”, – сказаў біскуп. 

Іерарх падзякаваў усім, хто ўдзельнічае ў перадачы гэтага сімвалу Божага Нараджэння. Словы ўдзячнасці ён выказаў харцэрам, якія прынеслі агонь у Гродна як знак Езуса Хрыста, які прыходзіць да нас у таямніцы свайго Нараджэння. Менавіта дзякуючы іх удзелу перадача Бэтлеемскага агню стала пастаянным элементам калядных традыцый у горадзе над Нёманам.

  Іерарх падзякаваў таксама скаўтам, якія занясуць гэты агонь у іншыя парафіяльныя супольнасці нашай краіны.

“Вы сімвалічным чынам будзеце вестунамі блізкіх святаў Божага Нараджэння. Няхай гэтае ганаровае заданне яшчэ больш мабілізуе вас штодзённа крочыць за Езусам і даваць пра Яго сведчанне словам і ўчынкам”, – сказаў біскуп.

Потым скаўты перададуць агонь у іншыя месцы нашай краіны. Дзякуючы гэтаму ён будзе даваць моц не толькі ім самім, але і ўсім, да каго яны яго занясуць.

А занесены ён будзе да ўсіх хрысціян, якія ў найбліжэйшыя дні будуць перажываць святы Божага Нараджэння. Ён будзе занесены ў шпіталі, хоспісы, да састарэлых, самотных і пакінутых. Разам з гэтым агнём да іх занясуць надзею і моц.

Акцыя Бэтлеемскага агню міру бярэ пачатак у Аўстрыі ў 1986 г. Агонь перадаецца з рук у рукі з Бэтлеема. У гроце Нараджэння Пана гарыць вечны агонь. Менавіта ад яго штогод запальваецца лампада, полымя якой, што нясуць скаўты праз краіны і кантыненты, абыходзіць свет.

Кс. Юрый Марціновіч

Фота: Вольга Сяліцкая

22 чэрвеня пры касцёле Найсвяцейшага Сэрца Пана Езуса ў Канвелішках (Радунскі дэканат) адбылося пахаванне кс. каноніка Тадэвуша Качана. Святар у 2004-2018 гг. быў пробашчам гэтай парафіі.

Урачыстая інтранізацыя абраза святой Ружы Лімскай адбылася 27 лістапада ў касцёле Маці Божай Нястомнай Дапамогі ў Карэлічах (Гродзенская дыяцэзія).

У гэтым мястэчку на Навагрудчыне нясуць служэнне святары з манаскага Ордэна святога Паўла, першага пустэльніка, якіх скарочана называюць «паўлінамі» ад лацінскай формы імя Павел.

Па іх запрашэнні цэлебрацыю святой Імшы з нагоды інтранізацыі абраза ўзначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.

Гэта ўжо другі на працягу месяца візіт іерарха ў карэліцкі касцёл, куды двума тыднямі раней з яго ўдзелам былі ўрачыста ўнесены рэліквіі благаслаўлёных сясцёр назарэтанак, мучаніц Другой сусветнай вайны з Навагрудка.

Разам з біскупам Эўхарыстыю цэлебравалі карэліцкія душпастыры і святары з суседніх парафій. Памаліцца праз заступніцтва паўднёваамерыканскай святой прыбылі шматлікія госці, сярод якіх было нямала кансэкраваных асоб: сёстры дамініканкі, уршулянкі, францішканкі ад церпячых і брат з супольнасці баніфратраў. Да сабраных у касцёле дзякуючы прамой трансляцыі на «Радыё Марыя» духоўна далучыліся вернікі з іншых мясцінаў.

Падчас цырымоніі інтранізацыі біскуп Касабуцкі благаславіў абраз святой Ружы, напісаны мастаком з Бярозаўкі Міхалам Савашынскім.

У прамоўленай гаміліі іерарх распавёў пра жыццё і дзейнасць святой Ружы Лімскай.

Святая Ружа Лімская была першай святой амерыканскага кантынента. Пражыла яна ўсяго 31 год (1586–1617 гг.). Нарадзілася ў Перу і падчас хросту атрымала імя Ізабэла, аднак з-за далікатнай скуры многія называлі яе Ружай.

Дзяўчына адмовілася ад прапановы выйсці замуж і рана пачала працаваць, займаючыся продажам кветак і шыццём. Ва ўзросце 20-і гадоў уступіла ў Трэці ордэн дамініканак. Шмат часу яна праводзіла ў малітве і посце, аказвала дапамогу бедным і хворым, асабліва індзейцам і нявольнікам. Ёй было дадзена зараней ведаць дзень сваёй смерці. Да шэрагу святых была далучана ў 1671 годзе.

Святая дамініканка з Лімы з’яўляецца апякункай садаводаў, кветкаводаў і дапамагае ў сем’ях, якія перажываюць крызісы.

У нашай краіне святая Ружа малавядомая. Чаму ж яе абраз вырашылі змясціць у карэліцкім касцёле?

На гэта ёсць некалькі прычын. Адна з іх — блізкасць харызмы ордэна, да якога належаць карэліцкія душпастыры, да харызмы святой Ружы. Па прыкладзе святой Кацярыны Сіенскай, яна вяла аскетычнае жыццё. Удзень працавала, а ўвечары да позняй гадзіны праводзіла час у самотнасці на малітве ў сваёй пустэльні.

Карэліцкія парафіяне з радасцю падтрымалі ініцыятыву свайго пробашча айца Юрыя Саковіча OSPРЕ, каб адзін з бакавых алтароў святыны прысвяціць святой Ружы.

У мястэчку жыве шмат кветкаводаў, якія хацелі б мець сваю нябесную апякунку, і гэта яшчэ адна з прычын з’яўлення абраза ў Карэлічах. Нарэшце, варта таксама зазначыць, што да святой Ружы звяртаюцца з просьбай аб прымірэнні ў сем’ях, а гэта актуальна паўсюль і ва ўсе часы.

Успамін святой Ружы Лімскай у Каталіцкім Касцёле адзначаецца 23 жніўня.

Вернікі, якія маюць ахвоту прыехаць у Карэлічы ў пілігрымцы да святой Ружы Лімскай, могуць звяртацца да айцоў паўлінаў па тэлефонах:

+375 (29) 282 86 76

+375 (25) 782 23 13

Паводле Catholic.by

28 кастрычніка, у свята апосталаў Сымона і Юды Тадэвуша, у катэдральным касцёле св. Францішка Ксаверыя ў Гродне адбылося ўрачыстае адкрыццё і асвячэнне адрэстаўраванага 300-гадовага алтара св. Юды Тадэвуша.

11 мая ў касцёл св. Юзафа Каласанса ў парафіі Унебаўзяцця Найсвяцейшай Панны Марыі ў Лідзе (м-н Індустрыяльны) па просьбе пробашча парафіі а. Аляксандра Махнача SP прыбыў абраз святой Барбары.

18 ліпеня вернікі Гродна і ваколіц, у першую чаргу маладыя людзі, у індывідуальным парадку вырашылі ўшанаваць памяць усіх жыхароў Гродна і Ліпска, якія загінулі падчас Другой сусветнай вайны.

21 лютага Яго Эксцэленцыя ганаровы мітрапаліт Мінска-Магілёўскі арцыбіскуп Тадэвуш Кандрусевіч удзяліў паслугі акалітату навучэнцам 4-га курса, а 5-курснік ВДС стаў кандыдатам да праняцця дыяканату.

Акалітамі сталі клерыкі 5 курса Яўген Абрамаў і Віталь Гурэц, а таксама 4-курснікі Арцём Кір'янаў, Павел Пагасай і Аляксандр Шыманскі. Кандыдатам жа да святарства быў прызнаны сёння навучэнец 5 курса Андрэй Юхнік.

"З гэтага моманту акаліты будуць непасрэдна ўдзельнічаць у здзяйсненні Эўхарыстыі, дапамагаючы святару. Прычым не толькі дакранацца да Найсвяцейшага Цела Езуса Хрыста, але і несці яго далей - вернікам і патрабуючым хворым. Устанаўленне ж у кандыдаты - гэта выраз таго даверу, які Касцёл выказвае таму, хто мае намер у будучыні служыць Богу і людзям", - адзначыў падчас гаміліі арцыбіскуп.

Прыняццю паслуг папярэднічалі трохдзённыя велікапосныя рэкалекцыі, якія завершыліся напярэдадні семінарыйнай урачыстасці. Гэтыя дні паспрыялі падрыхтоўцы клерыкаў да чарговага адказнага кроку на шляху да святарства.

Тэкст: Арцём Кір'янаў

Фота: Павел Леановіч

10 чэрвеня ў парафіі св. Тэрэзы Авільскай у Шчучыне адбылася Імша для выпускнікоў.

29 верасня, у свята святых Арханёлаў Міхала, Габрыэля і Рафала, у Вышэйшай духоўнай семінарыі ў Гродне адзначылі ўрачыстасць яе нябеснага апекуна – арханёла Міхала.

8 жніўня ў парафіi Унебаўзяцця Найсвяцейшай Панны Марыі ў Адамавічах (Сапоцкінскі дэканат) адбылася ўрачыстасць Першай святой Камуніі. Ёй папярэднічаў сакрамэнт пакаяння, да якога дзеці прыступілі днём раней.

У парафіi св. Юрыя ў Варнянах (Астравецкі дэканат) адбылася ўрачыстасць Першай святой Камуніі.

12 верасня ў капліцы Маці Божай Тройчы Дзівоснай у Данілавічах, якая належыць да парафіі ў Стараельні (Дзятлаўскі дэканат), адбылася ўрачыстасць Першай святой Камуніі.

13 верасня ў парафіі Нараджэння Найсвяцейшай Дзевы Марыі ў Дудах (Іўеўскі дэканат) адбылася ўрачыстасць Першай святой Камуніі.

3 чэрвеня, ва ўрачыстасць Найсвяцейшага Цела і Крыві Хрыста, біскуп Гродзенскі Аляксандр Кашкевіч цэлебраваў Эўхарыстыю ў катэдральным касцёле св. Францішка Ксаверыя ў Гродне.

Разам з іерархам Імшу канцэлебравалі Генеральны вікарый Гродзенскай дыяцэзіі біскуп Юзаф Станеўскі і святары, якія служаць у катэдры, на чале з пробашчам кс. канонікам Янам Кучынскім.

У гэтым годзе з прычыны пандэміі каранавірусу на Эўхарыстыі прысутнічалі толькі мясцовыя парафіяне. Звычайна ў ёй удзельнічалі вернікі ўсіх гродзенскіх парафій, якія затым выходзілі ў эўхарыстычнай працэсіі на вуліцы горада, каб засведчыць сваю веру.

Гамілію прамовіў біскуп Юзаф Станеўскі. Іерарх разважаў у ёй над таямніцай прысутнасці Бога ў белай гостыі, якая, адзначыў ён, з’яўляецца “скарбам Касцёла”, “сэрцам свету”, “мэтай, да якой кожны чалавек, нават несвядома, імкнецца”.

Па словах іерарха, перад гэтай таямніцай Бога, прысутнага ў Эўхарыстыі, “мы падаем на калені, каб змяніць рытм нашага жыцця, у якім углядаемся ўдалечыню з нашым планам і надзеяй”.

Генеральны вікарый дыяцэзіі падкрэсліў, што, калі чалавек прымае Цела Хрыста, то ўваходзіць з Ім у Камунію, спалучае сваё жыццё з Ягоным.

“Аб гэтым Езус добра ведаў, таму стаўся хлебам штодзённага спажывання, дзеля штодзённага станаўлення чалавечай святасці”, – сказаў іерарх.

Біскуп дадаў, што “той, хто прагне спазнаць Езуса ў Камуніі рэцэптарамі смаку, – застанецца насычаны толькі хлебам, а той, хто прымае Яго сэрцам, – наталяе душу моцай Божай”.

Пасля Імшы адбылася эўхарыстычная працэсія па касцёле. Яна спынялася ля чатырох алтароў, дзе вернікі дзякавалі Пану Богу за Яго прысутнасць у іх штодзённай рэчаіснасці, перапрашалі за грэх занядбання ў жыцці і прасілі аб моцы Яго благаслаўлення на далейшае крочанне дарогамі веры.

Кс. Юрый Марціновіч

Фота: Вольга Сяліцкая

11 чэрвеня з нагоды ўрачыстасці Найсвяцейшага Цела і Крыві Хрыста біскуп Гродзенскі Аляксандр Кашкевіч цэлебраваў святую Імшу ў катэдральным касцёле св. Францішка Ксаверыя ў Гродне.

З 31 снежня па 3 студзеня ў рэкалекцыйным доме пры парафіі св. Міхала Арханёла ў Навагрудку адбылася фармацыйная сустрэча евангелізацыйнага руху “Gloriosa Trinita” парафіі Святой Сям’і ў Лідзе.

Гэты рух ужо шмат гадоў існуе пры лідскай парафіі і аб’ядноўвае некалькі сотняў чалавек, якія супольна праслаўляюць Бога.

Фармацыйную сустрэчу, галоўнай думкай якой былі словы “Пабудуем дом Хрысту з нашых сэрцаў”, праводзілі кс. Андрэй Белаблоцкі і с. Катажына Бучыньская. 

Праз малітву, адпачынак, сведчанні, музыку ўдзельнікі аддалі ў рукі Бога пражыты год і прасілі аб благаслаўленні ў наступным. Мэтай сустрэчы было аднаўленне ў ідэнтычнасці руху, каб быць вернымі харызме супольнасці.

Удзельнікі ўдзячныя Пану за гэты праведзены супольна час, які, напэўна, прынясе ў будучыні плён Божай ласкі ў іх жыцці.

Каталіцкая харызматычна-евангелізацыйная супольнасць “Gloriosa Trinita” узнікла ў 2000 г. у Італіі. Гэты рух – прыватнае таварыства вернікаў, скіраванае перш за ўсё на сем’і і асобаў, прысвечаных Найсвяцейшай Тройцы, якая з’яўляецца прыкладам дасканалай сям’і. 

Мэта руху – ажыўленне веры ў сем’ях і ў сэрцах усіх людзей. Таму яго ўдзельнікі жадаюць увайсці ў праблемы штодзённага жыцця сучаснага чалавека, выходзячы да яго на вуліцы.

Кс. Юрый Марціновіч

31 студзеня ў Іўеўскім цэнтры культуры і вольнага часу адбыўся XVIII фестываль калядных песень і пастаралак “Gloria in Excelsis Deo”.

Сёлета з-за пандэміі каранавірусу не было вялікай колькасці ўдзельнікаў і гледачоў. Удзел у фестывалі прынялі ансамблі і салісты з Іўя, Трабаў і Лаздун.

На мерапрыемстве прысутнічалі консул Рэспублікі Польшча ў Гродне Анджэй Рачкоўскі і намеснік старшыні Іўеўскага райвыканкама Лідзія Носуль.

Прысутных прывітаў арганізатар фестывалю ксёндз Ян Гавецкі.

“Мы з вамі знаходзімся ў тым месцы, дзе ужо сямнаццаць разоў мы збіраліся ў вялікай колькасці, і я рады і ўдзячны раённым уладам, дому культуры, а найперш Пану Богу за магчымасць сабрацца і спяваць на хвалу нованароджанаму Езусу”, – сказаў святар.

Затым да прысутных звярнуліся Анджэй Рачкоўскі і Лідзія Носуль, якая выказала надзею, што ў наступны раз фестываль зноў збярэ вялікую колькасць удзельнікаў.

Распачаўся фестываль нумарам танцавальнага калектыву “Хорошенькие”, затым выступіў ансамбль “Надзея” – лаўрэат гран-пры фестывалю 2020 года. Самым кранальным было выступленне Анастасіі Гуранковай. Дзяўчынка не бачыць, але грае на музыкальных інструментах і ўжо не першы год становіцца ўдзельніцай не толькі фестывалю, але і дэканальнай пілігрымкі ў Тракелі.

Наймалодшым удзельнікам стаў саліст Мацвей Гушча. Па традыцыі выступіў і ксёндз Ян, які пад акампанемент арганіста іўеўскай парафіі Антона Шукава выканаў песню “Не мелі месца”.

На заканчэнне кожны ўдзельнік атрымаў падарункі. Пры развітанні ксёндз Ян падкрэсліў, што за гэтыя гады фестываль стаў школай для многіх людзей і паказаў свету таленты не аднаго пакалення дзяцей і моладзі.

Фестываль завяршыўся песняй у выкананні ўсіх удзельнікаў і пад моцныя апладысменты гледачоў.

Арганізатар выказвае вялікую ўдзячнасць Іўеўскаму раённаму выканаўчаму камітэту, Іўеўскаму цэнтру культуры і вольнага часу, Консульству Рэспублікі Польшча ў Гродне, дабрачыннай арганізацыі “Malteser”, калектыву Іўеўскай дзіцячай школы мастацтваў, тэлекампаніі “Ивье ТВ”, газеце “Іўеўскі край”, кіраўнікам творчых калектываў, тым, хто рупліва працаваў, каб падрыхтаваць падарункі для дзяцей, і ўсім, хто далучыўся да арганізацыі фестывалю.

Тэлеверсію фестывалю ў хуткім часе можна будзе пабачыць на тэлеканале “Ивье ТВ”.

Раман Ярмош

Фота: Баляслаў Гавецкі

4 верасня фігура святога Міхала Арханёла, галоўнага нябеснага апекуна Каталіцкага Касцёла ў Беларусі, прыбыла ў Гродна. З горада над Нёманам пачалася перэгрынацыя фігуры па чатырох катэдральных касцёлах усіх дыяцэзій на Беларусі ў інтэнцыі хутчэйшага вырашэння грамадска-палітычнага крызісу.

14 мая з нагоды сусветнага дня посту і малітвы аб спыненні пандэміі каранавірусу ў парафіі св. Міхала Арханёла ў Смаргоні адбылася адарацыя Найсвяцейшага Сакрамэнту, якая доўжылася ўвесь дзень.

21 чэрвеня Генеральны вікарый Гродзенскай дыяцэзіі біскуп Юзаф Станеўскі адзначыў 25-годдзе з часу прэзбітэрскага пасвячэння ў сваёй роднай парафіі.

Летні час у Касцёле асацыюецца з пешымі пілігрымкамі, якія з’яўляюцца своеасаблівым спосабам евангелізацыі. Сёлета гэты час адрозніваецца ад таго, што быў у мінулыя гады.

10 жніўня ў будынку Канферэнцыі Каталіцкіх Біскупаў у Беларусі ў Мінску адбыўся другі тур уступнага экзамену для кандыдатаў на першы год навучання ў Вышэйшых духоўных семінарыях у Гродне і Пінску.