Гісторыя душпастырства бярэ пачатак у 2005 годзе, калі група маладых людзей з Гродзенскай дыяцэзіі вярнулася з Сусветных дзён моладзі ў Кёльне (Германія). Хлопцы і дзяўчаты, прасякнутыя ідэяй адзінства, выказалі прапанову фарміравацца па-хрысціянску разам: не абмяжоўвацца арганізацыйнымі сустрэчамі напярэдадні СДМ, а мець нешта пастаяннае і стабільнае. У 2006 годзе біскуп Аляксандр Кашкевіч блаславіў моладзевую супольнасць на сумесныя сустрэчы пры пабрыгіцкім касцёле пад кіраўніцтвам душпастыра кс. Антонія Грэмзы.
Сёння ў межах душпастырства дзейнічаюць некалькі груп. Найбольш папулярная – “Уваскрасенне”. Гэта дабрачынная суполка, у якой займаюцца дапамогай хворым дзецям, сіротам, бяздомным. Яшчэ адна вялікая па колькасці ўдзельнікаў група – “Caritas Dei”. Гэта малітоўная суполка маладых людзей, якія збіраюцца на паўтарагадзінную адарацыю перад Найсвяцейшым Сакрамантам. У цішыні або сумесным праслаўленнем моладзь моліцца ў розных інтэнцыях і намерах. Таксама ў душпастырстве ёсць малітоўная група “Ружа Маці Божай Фацімскай”. Біблейская група “Effata” сустракаецца для разважання над Святым Пісаннем. Пры душпастырстве існуе музычны гурт з аднайменнай назвай. Яго ўдзельнікі дзеляцца сваімі талентамі праз спеў і ігру на музычных інструментах.
Па ініцыятыве сужэнскіх пар, якія належаць да “OPEN”, паўстала душпастырства маладых сем’яў. Раз на месяц сужэнцы разам з дзецьмі прыходзяць на спецыяльную св. Імшу і катэхезу.
Пры “OPEN” таксама існуе група афрыканскіх студэнтаў. Моладзь з Нігерыі, Камеруна і Філіпінаў удзельнічае ў сумесных сустрэчах душпастырства. Разам з іншымі яны святкуюць Вялікдзень і Божае Нараджэнне. Даюць канцэрты, дзеляцца адметнасцю сваёй веры.
Душпастырства паспяхова трансфармуецца ў новыя формы. Дзякуючы актыўным удзельнікам “OPEN” у Гродне паўстаў евангелізацыйны курс “Альфа”. Удзельнікі душпастырства пачалі дзяліцца сваёй верай не толькі ў коле супольнасці, але і па-за яго межамі сярод тых, каму яшчэ складана даверыцца Богу.
Штогод “OPEN” арганізуе такія вядомыя акцыі, як “Ружанец праз Skype”, “Пячэнька за пячэньку”. Традыцыйны Крыжовы шлях вуліцамі Гродна – таксама ініцыятыва душпастырства. Акрамя ўсяго, лідары супольнасці падтрымліваюць душпастыра ў шматлікіх дыяцэзіяльных мерапрыемствах.
Сустрэчы душпастырства моладзі “OPEN” адбываюцца кожны чацвер у 19.15 (св. Імша і агульнае спатканне) у касцёле Звеставання Найсвяцейшай Панны Марыі ў Гродне (пабрыгіцкі) па вул. К. Маркса, 27.
Біблейская група “Effata” – панядзелак, 20.00.
Дабрачынная група “Уваскрасенне” – аўторак, 20.00.
Музычны гурт “OPEN” – серада, 20.00.
Малітоўная група “Caritas Dei” – пятніца, 19.30.
Кантакты
(8 029) 632-43-73
кс. Антоній Грэмза, адказны за душпастырства моладзі Гродзенскай дыяцэзіі