18 мая Каталіцкі Касцёл адзначаe стогадовы юбілей з дня нараджэння Вялікага Папы Яна Паўла ІІ. Напярэдадні гэтай гадавіны, 17 мая, дзеці іўеўскай парафіі святых апосталаў Пятра і Паўла прачыталі вершы, прысвечаныя гэтаму святому.
Праслаўляць Бога можна па-рознаму. Хлопчыкі і дзяўчынкі вырашылі праславіць Пана і аднаго з найпапулярнейшых святых нашага часу сваім прамоўніцкім майстэрствам.
Пасля нядзельнай вячэрняй Імшы маладое пакаленне парафіі чытала вершы, агучвала думкі і словы Яна Паўла ІІ.
Незгасальная любоў да святога жыве ў сэрцах маленькіх вернікаў. Гэта адбываецца таму, што іх бабулі і дзядулі, мамы і таты памятаюць яго і моляцца праз яго заступніцтва, бо ён быў іх сябрам на дарозе да Бога ў дзяцінстве і маладосці. Таксама і цяпер, праз малітву, яны адчуваюць любоў і дапамогу апекуна Іўя, Папы-пілігрыма Яна Паўла ІІ.
У гэтым мерапрыемстве прынялі ўдзел восем дзяцей. Ва ўмовах пандэміі іх не магла слухаць “вялікая публіка”, але іх старанне і жаданне праславіць Папу з'яўляецца сапраўдным прыкладам веры і любові да Бога.
Іўе асабліва звязана са святым Янам Паўлам ІІ, таму што сярод парафіян ёсць тыя, каму пашчасціла прысутнічаць на ўрачыстасцях у Рыме падчас святкавання 20-годдзя і 25-годдзя яго пантыфікату.
У цэнтры Іўя знаходзіцца помнік Чатырох рэлігій. З каталіцкага боку ёсць барэльеф св. Яна Паўла II, a таксама бачныя яго словы “Адчыніце дзверы Хрысту”, якія ён сказаў у дзень распачацця свайго пантыфікату ў 1978 г.
Раман Ярмош
