У гадавіну сакры біскуп Гродзенскі наведаў санктуарый у Росі

23 мая, у 29-ю гадавіну біскупскай сакры, біскуп Гродзенскі Аляксандр Кашкевіч наведаў дыяцэзіяльны санктуарый Пана Езуса Журботнага ў Росі (Ваўкавыскі дэканат).

Іерарх узначаліў у святыні Імшу падзякі за ласкі, атрыманыя ад Бога на працягу ўсіх гадоў свайго біскупскага служэння ў Гродзенскай дыяцэзіі. Як падкрэсліў пастыр Касцёла на Гродзеншчыне, ён прыбыў у гэтае святое месца з патрэбы ўласнага сэрца, каб выказаць удзячнасць Езусу за ўсе атрыманыя дары, а таксама дзякаваць за ўсіх людзей, якіх Божы Провід паставіў на шляху яго пастырскага служэння.

Падчас Эўхарыстыі ён маліўся за тых, хто ўтварае Касцёл на Гродзеншчыне, уключаючы святароў, сясцёр законных, семінарыстаў і вернікаў дыяцэзіі.

Біскуп маліўся ў гэты дзень таксама за ўсіх, хто з-за пандэміі каранавірусу змагаецца з хваробай і цярпеннем. Ён атачыў малітвай і ўвесь медперсанал, які аказвае неабходную дапамогу хворым.

На заканчэнне Эўхарыстыі біскуп выказаў удзячнасць кусташу санктуарыя кс. каноніку Чэславу Паўлюкевічу за гасціннасць, а ўсім вернікам Гродзенскай дыяцэзіі асабліва за малітвы, якія яны ўзносілі за іерарха ў гэты дзень.

Папа Ян Павел ІІ прызначыў кс. Аляксандра Кашкевіча першым біскупам новаўтворанай Гродзенскай дыяцэзіі 13 красавіка 1991 г. Біскупскае пасвячэнне адбылося 23 мая 1991 г. у гродзенскай катэдры св. Францішка Ксаверыя.

Кс. Юрый Марціновіч