Час пандэміі, выкліканай пашырэннем каранавірусу, нараджае ў многіх людзях пачуццё адказнасці і гатоўнасць несці дапамогу медыцынскім установам. Шмат парафій нашай дыяцэзіі ўжо ўключылася ў дапамогу мясцовым шпіталям і медперсаналу.
14 мая вернікі парафіі святога Яна Паўла ІІ у Смаргоні на чале з пробашчам кс. Яўгенам Учкуронісам перадалі аддзяленню хуткай дапамогі Смаргонскай ЦРБ 55 камбінезонаў, 150 павязак і 45 пар бахілаў.
Праз аказанне неабходнай дапамогі парафіяне, чыім апекуном з’яўляецца святы Ян Павел ІІ, які асабліва заахвочваў чыніць міласэрнасць, вырашылі зрабіць свой унёсак у добрую справу.
Як адзначае пробашч, вернікі ахвотна прынялі ўдзел у дабрачыннай акцыі, сабралі грошы на пакупку тканіны. Такая чалавечая салідарнасць – пацвярджэнне і сведчанне веры парафіян, якія жадаюць і далей дапамагаць мясцоваму шпіталю.
Кс. Юрый Марціновіч
Фота: shliah.by
