24 мая салезіяне Смаргоні адзначыла ўрачыстасць Марыі Успамогі Хрысціянаў. Менавіта Марыю Успамогу хрысціянаў выбраў святы ксёндз Боско галоўнай апякункай усіх галін Салезіянскай сям’і: ксяндзоў салезіянаў, сясцёр законных – дачок Марыі Успамогі, салезіянаў-супрацоўнікаў, членаў асацыяцыі ADMA.
У парафіі св. Міхала Арханёла ў Смаргоні служаць ксяндзы салезіяне, сёстры салезіянкі, дзейнічаюць салезіяне-супрацоўнікі і Асацыяцыя Марыі Успамогі Хрысціянаў. Салезіянская сям’я адчувае сябе Марыйнай сям’ёй, таму прадстаўнікі ўсіх салезіянскіх груп Смаргоні з вялікай удзячнасцю сабраліся на Эўхарыстыі.
Урачыстасці папярэднічала навэнна. Члены Салезіянскай сям’і Беларусі рыхтаваліся на працягу дзевяці дзён, прымаючы ўдзел у супольнай малітве да Марыі Успамогі, якую арганізавалі анлайн члены асацыяцыі ADMA з парафіі св. Яна Хрысціцеля ў Мінску. Кожны дзень вернікі, якія не мелі магчымасці маліцца ў святыні, маліліся дома дзякуючы відэаролікам, размешчаным у інтэрнэце. Так незвычайна Марыя выкарыстала зусім неспрыяльныя ўмовы для аб’яднання сваіх паслядоўнікаў.
Святочную Імшу ў парафіі св. Міхала Арханёла ў Смаргоні цэлебраваў кс. Артур Ляшнеўскі SDB. У гаміліі ён растлумачыў вернікам значэнне тытулу Успамога Хрысціянаў. Таксама святар прыгадаў далёкія часы Сярэднявечча, калі Марыя выратавала Еўропу ад мусульманскага нашэсця, і больш блізкія падзеі ХІХ ст., калі Яна выратавала Папу ад здзекаў імператара Напалеона.
Але не толькі знакамітыя людзі атрымлівалі дапамогу ад Маці Божай, да якой звярталіся са словамі: “Марыя Успамога, маліся за нас!” Бедныя хлопцы святога ксяндза Боско таксама адчулі Яе абарону і суцяшэнне. Дзякуючы гаміліі кс. Артура вернікі XXI стагоддзя мелі магчымасць рэальна ўявіць, як некалькі стагоддзяў таму простыя людзі на дзвярах сваіх дамоў выразалі гэтыя словы.
У гэты дзень члены Асацыяцыі Марыі Успамогі Хрысціянаў традыцыйна аднавілі свае абяцанні асаблівай формы хрысціянскага і грамадскага жыцця, прысвечанага Марыі Успамозе, і ў знак падзякі за прыналежнасць да асацыяцыі і дапамогу Маці Божай усклалі перад Ёй кветкі.
Усе салезіяне ў гэты дзень сведчылі аб Яе мацярынскім клопаце, таму ў кожным салезіянскім касцёле, араторыі, сям’і гучалі акты аддання Марыі Успамозе. Кс. Артур Ляшнеўскі SDB, с. Ірына Барцэвіч FMA, с. Вераніка Блізнюк FMA, с. Валянціна Кот FMA і с. Юлія Клявец FMA аддалі сябе пад апеку Марыі Успамогі Хрысціянаў і, ускладаючы ружы да Яе ног, сведчылі аб гатоўнасці мужна выконваць тую місію, да якой былі пакліканы ксяндзом Боско і Маці Божай.
Наталля Субко
