Віктар Рушлевіч з Вавёркі прыняў пасвячэнне дыяканату ў супольнасці рэгулярных латэранскіх канонікаў

9 мая ў базыліцы Божага Цела ў Кракаве (Польшча) семінарыст Віктар Рушлевіч з Ордэна рэгулярных латэранскіх канонікаў прыняў дыяканскае пасвячэнне.

Дыякан Віктар Рушлевіч CRL паходзіць з парафіі Перамянення Пана ў Вавёрцы (Лідскі дэканат).

Пасвячэнне ўдзяліў падчас святой Імшы біскуп Раман Пiндэль, ардынарый Бельска-Жывецкай дыяцэзіі. У Эўхарыстыі ўдзельнічалі візітатар кс. Дарыюш Качынскі CRL, іншыя святары і госці. Пасля ўрачыстай малітвы пасвячэння і ўручэння кнігі Евангелля новы дыякан упершыню спаўняў сваё служэнне ля алтара.

Ордэн рэгулярных канонікаў, да якога належыць дыякан Рушлевіч, засноўвае сваю духоўнасць на Рэгуле св. Аўгустына. Ён практыкуе евангельскія цноты паслухмянасці, чыстасці і супольнага жыцця без уласнасці. Ордэн не прывязвае сваю душпастырскую дзейнасць да нейкай канкрэтнай сферы. Ён адкрыты на любую форму працы ў Касцёле.

Дэвіз ордэну, у якім заключаецца ўся яго місія, – словы з Дзеяў Апосталаў: мець «адно сэрца і адзін дух», як у манаскім жыцці ў кляштарах, так і ў душпастырскім служэнні Касцёлу.

У Беларусі рэгулярныя латэранскія канонікі служаць ужо шмат гадоў на тэрыторыі Гродзенскай дыяцэзіі – у Вавёрцы, ядкуль паходзіць дыякан Віктар Рушлевіч. Зараз там служыць адзін святар, які таксама паходзіць з гэтай парафіі, – кс. Андрэй Роўба CRL.

Кс. Юрый Марціновіч