Парафіяда дзяцей і моладзі Гродзенскай дыяцэзіі бярэ пачатак у 2008 годзе. Ідэя правядзення падобнага мерапрыемства запазычана ў Польшчы, дзе ладзіцца міжнародная Парафіяда.
Праект заснаваны на старажытнагрэчаскай трыядзе “Святыня – Тэатр – Стадыён”. Яе арганізатары забяспечваюць удзельнікам выхаваўча-рэлігійную, культурную і спартыўную праграму. Элемент “Святыня” уключае біблійны конкурс, конкурс рэлігійнай песні “Sacro Song”. Элемент “Тэатр” – конкурс малюнкаў, конкурс “Музыка – маё жыццё”, конкурс ведаў па гісторыі і жыцці Касцёла, конкурс малых тэатральных форм. Элемент “Стадыён” – бег 60 м, бег 100 м, бег 800 м, бег 1000 м, бег 1500 м, скачкі ў даўжыню з разбегу, кіданне мяча, бадмінтон, настольны тэніс, шашкі, валейбол, футбол, плаванне. Разам з тым, маладыя вернікі штодня ўдзельнічаюць у св. Імшы і супольных малітвах. Напрыканцы вызначаюцца пераможцы ў камандным складзе і ў кожным з элементаў трыяды.
Штогод у мерапрыемстве прымаюць удзел каля паўтысячы маладых людзей ва ўзросце 11–19 гадоў. У іх ліку дзеці і моладзь не толькі з Гродзенскай дыяцэзіі – з усёй Беларусі. Па традыцыі Парафіяда праходзіць на тэрыторыі парафій Беззаганнага Зачацця Найсвяцейшай Панны Марыі (Гродна-Паўднёвы) і Найсвяцейшага Адкупіцеля (Гродна-Дзевятоўка). На час правядзення спартыўных спаборніцтваў арэндуецца гарадскі стадыён ЦСК “Неман”. Харчаванне і пражыванне ўдзельнікам забяспечваюць арганізатары. Адказны за правядзенне мерапрыемства кс. Артур Малафей.
Галоўная мэта Парафіяды – прадставіць магчымасць маладым людзям адкрыць сябе ў розных праявах.
Кантакты
(8 033) 624-35-22
(8 029) 319-54-65
кс. Артур Малафей, арганізатар Парафіяды