23 мая ў касцёле Найсвяцейшай Тройцы ў Глыбокім (Віцебская дыяцэзія) біскуп Алег Буткевіч удзяліў прэзбітэрскае пасвячэнне. Прэзбітэрамі Касцёла на Віцебшчыне сталі дыяканы Ілля Саўчанка з супольнасці айцоў марыянаў і Яўген Шымановіч.
Ксёндз Яўген Шымановіч паходзіць з тэрыторыі нашай Гродзенскай дыяцэзіі з парафіі Найсвяцейшага Сэрца Пана Езуса i св. Андрэя Баболі ў Мінойтах (Лідскі дэканат).
Як паведамляе сatholicnews.by, на ўрачыстасць прыбылі Апостальскі візітатар для грэка-католікаў Беларусі архімандрыт Сяргей Гаек, айцы марыяне, якія служаць у Беларусі, святары з Віцебскай дыяцэзіі. Да малітоўнай падтрымкі далучыліся вернікі з Глыбокага і госці з іншых парафій.
Ксёндз Яўген Шымановіч нарадзіўся 8 студзеня 1991 года. Працаваў праграмістам, вучыўся ў Мінскім катэхетычным каледжы, затым у Філасофска-багаслоўскай Акадэміі Бэнэдыкта XVI у Хайлігенкройцы (Аўстрыя), там жа праходзіў фармацыю ў семінарыі, належыць да супольнасці “Сям’я Бога Айца” ў Аўстрыі.
7 снежня 2019 года ў Глыбокім з рук біскупа Віцебскага Алега Буткевіча атрымаў дыяканскае пасвячэнне. Дыяканскую практыку праходзіў у глыбоцкай парафіі. Інкардынаваны ў Віцебскую дыяцэзію.
