Біскуп Гродзенскі наведаў санктуарый у Тракелях і абмеркаваў фармат сёлетняй адпустовай урачыстасці

1 чэрвеня біскуп Гродзенскі Аляксандр Кашкевіч наведаў дыяцэзіяльны санктуарый Маці Божай Каралевы нашых сем’яў у Тракелях (Радунскі дэканат).

З нагоды Міжнароднага дня дзіцяці іерарх маліўся ў інтэнцыі ўсіх дзяцей, асабліва тых, якія ў гэтым годзе ўпершыню прыступаюць да святой Камуніі. Урачыстасці Першай Камуніі з прычыны эпідэміі каранавірусу былі перанесены на восень.

У святыні біскуп Кашкевіч цэлебраваў святую Імшу, падчас якой таксама маліўся за ўсіх хворых і церпячых з прычыны небяпечнага вірусу. Ён даручыў Маці Божай усе сем’і Гродзенскай дыяцэзіі, просячы, каб яны былі моцныя Богам і каб эпідэміялагічная сітуацыя не аслабіла іх веры.

Кусташ санктуарыя кс. доктар Юрый Бяганскі азнаёміў іерарха з працамі, якія ў апошні час вельмі інтэнсіўна вядуцца пры санктуарыі. У сваю чаргу біскуп выказаў здзіўленне, што з кожным днём змяняецца аблічча санктуарыя, становячыся ўсё прыгажэйшым, і захапляе хараством тэрыторыя вакол святыні.

Пастыр Касцёла на Гродзеншчыне разам з кусташам абмеркаваў правядзенне сёлетняй адпустовай урачыстасці ў санктуарыі, якая, напэўна, адбудзецца з прычыны эпідэміі ў іншым фармаце і ў іншы час.

Пра ўсе змены і праграму сёлетняй адпустовай урачыстасці ў Тракелях будзе паведамлена пазней.

Кс. Юрый Марціновіч