Гродзенец з супольнасці сэрцанаў прыняў прэзбітэрскае пасвячэнне

Падрабязнасці: Катэгорыя: Навіны; Апублікавана 18 Мая 2020

16 мая, ва ўспамін святога Андрэя Баболі, святара і мучаніка, у Вышэйшай місійнай семінарыі ксяндзоў сэрцанаў у Стадніках (Польшча) адбыліся прэзбітэрскае і дыяканскае пасвячэнні.

Сакрамэнт пасвячэння ў ступені дыяканату прыняў Генадзь Лаўніковіч SCI з Варапаева (Віцебская дыяцэзія), а ў ступені прэзбітэрату – дыякан Віталій Венцкевіч SCI, які паходзіць з гродзенскай парафіі Божай Міласэрнасці (Вішнявец). У яго роднай парафіі служаць ксяндзы сэрцане. У Гродзенскай дыяцэзіі сэрцане працуюць таксама ў Астрыне.

Пасвячэнні ў капліцы семінарыі ўдзяліў дапаможны біскуп Люблінскай архідыяцэзіі Юзаф Врубэль SCI.

З прычыны эпідэміі многія вернікі, у тым ліку родныя тых, хто прымаў пасвячэнні, не маглі ўдзельнічаць у гэтай урачыстасці. Таму правінцыял Польскай правінцыі ксяндзоў сэрцанаў кс. Веслаў Свеньх SCI з дапамогай радыё Profeto.pl, якое транслявала гэтую падзею, выказаў удзячнасць іх бацькам і родным за выхаванне гэтых маладых людзей.

Ксёндз Віталій Венцкевіч SCI, які паходзіць з нашай дыяцэзіі, нарадзіўся 13 снежня 1993 г. у Гродне. Адразу пасля заканчэння школы ўступіў у супольнасць сэрцанаў, дзе распачаў фармацыю. У 2014 годзе прынёс свае першыя манаскія абяцанні, а ў 2018 – вечныя.

У 2019 годзе яму ўдзяліў дыяканскае пасвячэнне біскуп Эдвард Яняк, ардынарый Каліскай дыяцэзіі (Польшча).Цяпер, пасля заканчэння фармацыі, накіроўваецца на служэнне ў Беларусь.

Два гады таму святаром стаў яго старэйшы родны брат, які належыць да той жа манаскай супольнасці.

Супольнасць ксяндзоў сэрцанаў была заснавана з мэтай паказваць свету таямніцу любові Езуса да Айца і да людзей. Гэтая супольнасць павінна асаблівым чынам наследаваць св. апостала Яна, які спачываў на грудзях Хрыста падчас Апошняй Вячэры і застаўся верным Настаўніку ў час Яго смерці.

Заснавальнік супольнасці, французскі святар Леон Ян Дэхон, сярод матываў, якія схілілі яго ў 1878 г. паклікаць яе да жыцця, на першае месца ставіў жаданне, выражанае Панам, каб знайшліся душы, прысвечаныя любові да Яго і ўзнагароджанню Яго Сэрцу за грахі людзей, Касцёла і грамадства.