24 мая ў касцёле Нараджэння Найсвяцейшай Панны Марыі ў Трабах (Іўеўскі дэканат) адзначылі 80-годдзе з часу мучаніцкай смерці кс. Вацлава Радзько, былога пробашча, які стаў ахвярай “невядомых злачынцаў”.
Ксёндз Радзько служыў у гэтай парафіі як пробашч у 1938-1940 гг. Раней ён працаваў на тэрыторыі сённяшняй Гродзенскай дыяцэзіі ў фарным касцёле ў Гродне, а таксама ў Тракелях, Гальшанах і Старых Васілішках.
Святар, нягледзячы на тое, што служыў у гэтай парафіі вельмі нядоўгі час і сведкаў яго жыцця сёння, напэўна, было б цяжка знайсці, застаецца ў жывой памяці мясцовых вернікаў.
У гадавіну яго мучаніцкай смерці парафіяне ўспамінаць яго ў сваіх малітвах асаблівым чынам. З пакалення ў пакаленне яны перадаюць і гісторыю гэтай трагічнай смерці. Гэтая падзея назаўжды застанецца ў сэрцах трабскіх вернікаў.
Вясной 1940 года кс. Вацлаў Радзько напярэдадні ўрачыстасці Найсвяцейшага Цела і Крыві Пана быў пакліканы да хворага і выехаў з плябаніі. На наступны дзень вернікі з Трабаў і навакольных вёсак прыбылі на ўрачыстасць, але святар так і не прыйшоў у касцёл. Толькі праз тры дні знявечанае цела 65-гадовага ксяндза, якое мела сляды катаванняў, знайшлі пры дарозе з Трабаў у Гальшаны. У забітага святара была адсечана галава.
У дзень 80-годдзя смерці свайго былога душпастыра вернікі парафіі ў Трабах сабраліся на яго магіле, якая знаходзіцца каля святыні. Такім чынам яны выказалі ўдзячнасць Богу за дар жыцця гэтага святара і за ўсё дабро, якое праз яго служэнне атрымалі мінулыя пакаленні парафіян.
Кс. Юрый Марціновіч
