Заканчэнне чарговага каляндарнага года дае нагоду зрабіць падсумаванне таго, што ўдалося здзейсніць на яго працягу. Таксама гэта нагода падзякаваць Пану Богу за ўсё дабро, якое мы атрымалі.
А ў нас, безумоўна, ёсць за што дзякаваць! У жыцці і супольнасцяў, і сем’яў, і асобных людзей можна знайсці нямала добрага, што адбылося за гэты час, нямала радасных момантаў.
Каталіцкі Касцёл на Гродзеншчыне таксама мае шмат прычын для радасці і ўдзячнасці Богу. Гэты год быў насычаны разнастайнымі падзеямі, юбілеямі, сустрэчамі, былі рэалізаваны розныя душпастырскія праекты, якія ўпісаліся ў гісторыю мясцовага Касцёла.
Найважнейшай з гэтых падзей было тое, што наша дыяцэзія атрымала новага біскупа.
Дзякуючы Пану за ўсе гэтыя падзеі, хочам прыгадаць некаторыя з іх, каб яшчэ раз вярнуцца да тых хвілін.
Студзень
У гродзенскай парафіі Святога Духа, дзе будуецца касцёл, ва ўрачыстасць Аб’яўлення Пана біскуп Гродзенскі Аляксандр Кашкевіч здзейсніў благаслаўленне крыжа і парафіяльнага дома.
11 лютага ў гродзенскай катэдры св. Францішка Ксаверыя адбылося адкрыццё і асвячэнне адноўленага алтара “Бічаванне Пана Езуса”. Святую Імшу ля алтара ўзначаліў біскуп Гродзенскі Аляксандр Кашкевіч.
Сакавік
23 сакавіка ў Гродне адбыўся інсцэніраваны Крыжовы шлях вуліцамі горада. Некалькі гадоў ён не праводзіўся з-за пандэміі каранавірусу. У ім удзельнічалі некалькі соцень чалавек, інсцэніроўку падрыхтавалі вернікі парафіі Перамянення Пана ў Вялікай Бераставіцы.
Красавік
5 красавіка Апостальская нунцыятура ў Рэспубліцы Беларусь паведаміла, што Папа Францішак прызначыў кс. каноніка Уладзіміра Гуляя, пробашча парафіі Узвышэння Святога Крыжа ў Лідзе i біскупскага вікарыя для Лідскага рэгіёну, біскупам-каад’ютарам Гродзенскай дыяцэзіі.
Пасвячэнне новага біскупа адбылося 25 мая ў гродзенскай катэдры.
Біскуп-каад’ютар стаў біскупам Гродзенскім, пасля таго як 30 верасня Папа Францішак прыняў адстаўку біскупа Аляксандра Кашкевіча ў сувязі з дасягненнем ім 75-гадовага ўзросту.
Служэнне новага ардынарыя дыяцэзіі афіцыйна распачалося яго інгрэсам – урачыстым уваходам у гродзенскую катэдру, які адбыўся 26 кастрычніка.
Май
24 мая дабрачыннае каталіцкае таварыства “Caritas” Гродзенскай дыяцэзіі адзначыла 30-годдзе з часу дзяржаўнай рэгістрацыі. Святкаванне прайшло ў Сапоцкіне каля Гродна.
Чэрвень
1 чэрвеня, у Міжнародны дзень абароны дзяцей, пры гродзенскай парафіі Беззаганнага Зачацця Найсвяцейшай Панны Марыі прайшоў X Дыяцэзіяльны дзень дзіцяці пад дэвізам “З малітвай праз жыццё”. На свяце прысутнічала больш за 1500 дзяцей з Гродзенскай дыяцэзіі і група дзяцей з Віцебскай дыяцэзіі – з парафіі Беззаганнага Зачацця Найсвяцейшай Панны Марыі ва Удзеле.
Ліпень
12-13 ліпеня ў санктуарыі Маці Божай Каралевы нашых сем’яў у Тракелях (Радунскі дэканат) адбыліся дыяцэзіяльныя адпустовыя ўрачыстасці. Сёлета яны праходзілі пад дэвізам “Марыя – наша Каралева”, у іх межах адзначалася 15-годдзе з часу каранавання цудадзейнага тракельскага абраза.
Жнівень
11 жніўня ў Гнезне (Ваўкавыскі дэканат) адзначылі 500-гадовы юбілей касцёла св. Арханёла Міхала. Касцёл з’яўляецца помнікам архітэктуры позняй готыкі і адной з найстарэйшых у Беларусі святыняў.
Верасень
7 верасня ў катэдры Унебаўзяцця Найсвяцейшай Панны Марыі ў Пінску адбылося біскупскае пасвячэнне кс. каноніка Андрэя Зноскі, якога ў ліпені Папа Францішак прызначыў дапаможным біскупам Пінскай дыяцэзіі. Раней ён належаў да прэзбітэрыя Гродзенскай дыяцэзіі, быў пробашчам лідскай парафіі Божай Міласэрнасці.
Кастрычнік
12 кастрычніка ў санктуарыі Гродзенскай дыяцэзіі ў Барунах (Ашмянскі дэканат) адбылося каранаванне цудадзейнага абраза Маці Божай. Больш за тры стагоддзі ён ушаноўваецца пад тытулам Суцяшальніцы засмучаных. Кароны на абраз усклаў біскуп Аляксандр Кашкевіч.
Лістапад
10 лістапада ў гродзенскім мікрараёне Грандзічы біскуп Гродзенскі Уладзімір Гуляй благаславіў пляцоўку пад будаўніцтва новага касцёла і крыж. Касцёл будзе пабудаваны на вул. Саяпіна і будзе насіць тытул св. Айца Піо.
Снежань
14 снежня ў парафіі св. Максімільяна Кольбэ і св. Станіслава ў Каробчыцах (дэканат Гродна-Захад) біскуп Гродзенскі Уладзімір Гуляй здзейсніў благаслаўленне звана для будучага касцёла і благаслаўленне памяшканняў парафіяльнага дома.
Гэта толькі некаторыя з падзей, якія мелі месца ў Касцёле на Гродзешчыне ў 2024 годзе. Было і шмат іншых падзей, якія, безумоўна, упісаліся ў гісторыю дыяцэзіі і прынеслі плён узрастання веры ў сэрцах людзей.
Няхай будзе падзяка Богу за ўсё дабро, якое атрымаў наш Касцёл і нашы вернікі! Няхай будзе падзяка Яму за ўсё, што атрымаў кожны з нас!
Прэс-служба Гродзенскай дыяцэзіі
