У Каробчыцах біскуп Гуляй здзейсніў благаслаўленне звана

14 снежня біскуп Гродзенскі Уладзімір Гуляй наведаў парафіяльную супольнасць св. Максімільяна Кольбэ і св. Станіслава, біскупа, у Каробчыцах (дэканат Гродна-Захад).

Іерарх здзейсніў благаслаўленне звана, які будзе клікаць людзей на малітву з вежы касцёла, што будуецца на тэрыторыі парафіі.

Затым у парафіяльнай капліцы адбылася святая Імша, якую ўзначаліў біскуп Гродзенскі. На літургіі ён асаблівым чынам маліўся ў інтэнцыі ўсіх, хто ўтварае гэтую парафіяльную супольнасць на чале з яе пробашчам кс. Янам Рушніцкім і ўдзельнічае ў будаўніцтве касцёла.

У гаміліі, разважаючы над літургічным чытаннем, біскуп звярнуў увагу на тое, што хрысціянін моцны сілай магутнасці Бога, а не сам па сабе: “Калі ён з праўдай і пакорай сэрца глядзіць на сябе і сваё жыццё, ён павінен часта паўтараць за святым Паўлам, што “носім гэты скарб у гліняных начыннях”, слабых і далікатных па сваёй прыродзе, схільных да знішчэння і смерці. Таму наша сіла – не ў нас саміх і не ў тым, што звязана з чалавечай уладай і моцай, пазначанымі слабасцю, страсцямі і жаданнем валадарыць адзін над адным. Сіла Божай магутнасці заключаецца ў праўдзе, справядлівасці і міры”.

Біскуп падкрэсліў, што сродкі духоўнай барацьбы хрысціян – вера, Божае слова і малітва. “Званы ў нашых касцёлах заклікаюць нас і нагадваюць, каб мы, як казаў апостал Павел, з усялякай руплівасцю клапаціліся пра гэта, – адзначыў ён з нагоды благаслаўлення звана, якое было здзейснена перад Імшой. – Гук званоў нагадвае нам пра нашае духоўнае змаганне, да якога кліча нас Бог, нагадвае пра заклік да веры, якая ёсць дарам і ласкай адвечнага Бога. Гэта запрашэнне, звернутае да кожнага чалавека, адказаць сваім жыццём на гэты дар і ласку. Адказваючы, мы павінны памятаць, што вера не можа заставацца толькі ў рэлігійных пачуццях ці настроях, а павінна прысутнічаць у нашым мысленні і дзеяннях, у працы над сабой і ў апостальскай дзейнасці”.

Таксама, па словах біскупа, гук званоў паказвае, што “вера нараджаецца са слухання”. “А тое, што мы слухаем у касцёле, – гэта Слова Божае. Магчыма, гук званоў – гэта пэўнае абуджэнне нашага сумлення, нашага нутра, каб мы з большым даверам адкрываліся на Слова Божае”, – дадаў ён.

Гук званоў заклікае і да малітвы, адзначыў іерарх і заўважыў, што “ў нашым духоўным змаганні ўсё адбываецца на малітве, таму Касцёл заклікае нас да пастаяннай малітвы, каб мы пры кожнай магчымасці маліліся ў Духу Святым”.

Біскуп дадаў, што для сучасных людзей робяцца богам тэхналогіі, штучны інтэлект, Інтэрнэт і іншае, “аднак святы Павел вучыць нас: калі я гавару мовамі людзей і анёлаў, а любові не маю, то я нішто”. “Адных толькі ведаў недастаткова. Езус прыходзіць з веданнем любові, каб змяніць гэты свет”, – падкрэсліў іерарх.

Ён пажадаў, каб кожны ўдар звана на парафіяльным касцёле “прыводзіў да навяртання грэшнікаў, быў голасам Бога, абуджаў сумленні, радаваў справядлівых, клікаў жывых да малітвы, плакаў па памерлых і абвяшчаў надзею на збаўленне” і каб благаслаўленне гэтага звана стала “яшчэ адным заклікам да веры і любові, заклікам да веры ў Бога, багатага на міласэрнасць, якому мы даверыліся, заклікам верыць у Яго любоў да нас і адказваць на яе любоўю”.

У канцы Імшы парафіяне і пробашч выказалі біскупу падзяку за візіт і ўдзел у гэтай падзеі, якая наблізіла парафіяльную супольнасць да заканчэння чарговых этапаў будаўніцтва святыні.

У той жа дзень пастыр Касцёла на Гродзеншчыне благаславіў пакоі парафіяльнага дома, прызначаныя для катэхетычных заняткаў і для пражывання святара.

Прэс-служба Гродзенскай дыяцэзіі

Фота: Віталій Шмурай