21 верасня ў гродзенскай парафіі Святога Духа (мікрараён Альшанка) адбылося ўрачыстае адкрыццё моладзевай залы “Arca”. Зала знаходзіцца пры парафіяльнай святыні.

Абрад благаслаўлення залы здзейсніў пробашч кс. канонік Павел Салабуда ў прысутнасці іншых святароў, законных сясцёр і маладых вернікаў парафіі.
Вольга Ляховіч, якая паведаміла нам пра гэтую падзею, называе яе “хаця і невялікім, але значным мерапрыемствам”, а словы пробашча, у якіх ён заахвоціў моладзь “перадаць спадчыну сваім малодшым братам і сёстрам”, – “не проста пажаданнем, а даручанай альшанскай моладзі місіяй, якая сведчыць пра вялікую надзею, ускладзеную парафіяй на моладзь, прызнаннем патэнцыялу, энтузіязму і адказнасці моладзі за тое, каб быць прыкладам для іншых”.

“Для маладых вернікаў парафіі наяўнасць уласнай залы “Arca” – велізарны крок наперад. Цяпер у іх з’явілася сваё месца не толькі для супольнай малітвы, але і для малітоўных вечароў, вывучэння катэхізісу, а галоўнае – для таго, каб быць разам у вольны час. Менавіта гэта стварае ўмовы для шчырых і моцных адносін, – кажа Вольга Ляховіч. – Пасля благаслаўлення новая “Arca” адразу ж напоўнілася жыццём, смехам і энергіяй маладой супольнасці”.

У дзень адкрыцця залы былі танцы, размовы каля грыля, магчымасць правесці час у коле сяброў.

Прэс-служба Гродзенскай дыяцэзіі

У нядзелю 31 жніўня ў гродзенскай парафіі Святога Духа цэлебраваў Імшу Мітрапаліт Мінска-Магілёўскі арцыбіскуп Юзаф Станеўскі. Па традыцыі на гэтай літургіі, якая адбылася напярэдадні новага навучальнага года, было ўдзелена благаслаўленне дзецям і здзейснены абрад благаслаўлення школьных прыладаў – важны духоўны знак пачатку новага этапу для вучняў, настаўнікаў і бацькоў.

У гаміліі арцыбіскуп звярнуўся з цёплымі словамі да дзяцей, моладзі і дарослых, нагадаўшы, што атрыманне ведаў – не толькі шлях асабістага развіцця, але і ўнёсак у будучыню грамадства. Ён падкрэсліў, што адукацыя фармуе сталую асобу, здольную адказна служыць бліжнім і Айчыне.

У гаміліі было месца для жартаў і жыццёвых прыкладаў, якія паказвалі, як веды дапамагаюць у розных сітуацыях. Гэтыя словы іерарха выклікалі ўсмешкі вернікаў і былі натхненнем да таго, каб распачаць навучальны і душпастырскі год з новым запалам і сіламі.

Дыякан Марцін Лудзіч, які служыць у парафіі Святога Духа, паведаміў, што прысутнасць арцыбіскупа ў гэты дзень была “асаблівым дарам для ўсёй парафіяльнай супольнасці” і што на літургіі панавала “атмасфера радасці, малітвы і адзінства”.

“Душпастырскае жыццё парафіі Святога Духа вельмі жывое, – адзначае дыякан, кажучы ўвогуле пра гэтую парафію. – Гэта актыўная супольнасць, якая расце як духоўная сям’я, дзе кожны можа знайсці сваё служэнне і шлях духоўнага росту, дзе вера ажывае ў малітве, служэнні і радасці”.

Дыякан нагадвае, што ў парафіі рэгулярна праходзяць: катэхізацыя дзяцей і моладзі, а таксама катэхезы для дарослых, якія жадаюць глыбейшага знаёмства з Богам і ўмацавання ў веры; сустрэчы супольнасці “Мужчыны святога Юзафа”, якая аб’ядноўвае мужчын у малітве, падтрымцы і служэнні; сустрэчы для настаўнікаў з мэтай паглыблення іх веры, каб у сваю чаргу праз іх вера перадавалася дзецям розных сацыяльных груп і ўзростаў; рэлігійны курс “Альфа”, які дае кожнаму магчымасць задаць пытанні пра веру і знайсці адказы ў атмасферы дыялогу. Таксама ў парафіі дзейнічаюць дзіцячы, моладзевы і дарослыя хоры, якія спяваюць на святой Імшы, і існуе развітае служэнне міністрантаў.

Прэс-служба Гродзенскай дыяцэзіі

28 мая ў парафіі Святога Духа ў Гродне (Альшанка) адбылося вялікае свята. У гэты дзень святую Камунію ў першы раз прынялі тры групы маленькіх вернікаў, агульны лік якіх склаў каля 200 чалавек.

Па колькасці дзяцей, якія прыступілі да Першай Камуніі, гэта рэкорд сярод каталіцкіх парафій ва ўсёй Беларусі.

Да гэтай значнай падзеі дзяцей два гады рыхтавала с. Бернадэтта CSSH.

На Першую святую Камунію раніцай завітаў ксёндз Віталій Сідорка, які ў гаміліі параўнаў дзіцячае сэрца з клінкерам.

“Клінкер – гэта цэгла, якая вырабляецца пад вялікай тэмпературай. І толькі па гэтай прычыне становіцца тым, чым ёсць. У кожнага чалавека ёсць і будуць розныя цяжкасці ў жыцці. Толькі з Богам можна ўсё пераадолець”, – разважаў святар.

Да іншай групы дзяцей завітаў ксёндз Віктар Ханько, які заахвоціў кожнага з іх старацца прыносіць плён у духоўным жыцці.

На кожнай святой Імшы пробашч парафіі ксёндз канонік Павел Салабуда звяртаўся да бацькоў, заклікаючы іх рабіць усё для духоўнага выхавання сваіх дзяцей.

“Як важна сёння чалавеку быць моцным у Богу, асабліва маладому чалавеку. Свята Першай святой Камуніі – гэта той момант для нас усіх, калі Бог, прысутнічаючы ў жыцці кожнага, умацоўвае нас у веры”, – заўважыў кс. Павел.

На заканчэнне кожнай Імшы пробашч прасіў дзяцей быць вернымі Богу і ўмацоўваць сваю веру. А бацькі, дзякуючы парафіі за час, прысвечаны дзецям, падарылі касцёлу звон.

Наталля Лазоўская

Фота: Віталій Шмурай

6 верасня, у першую нядзелю восені, як і кожны год, у парафіі Святога Духа ў Гродне (Альшанка) благаслаўляліся школьныя прылады. У гэты дзень парафію наведаў біскуп Гродзенскі Аляксандр Кашкевіч.

Іерарх узначаліў святую Імшу, памаліўшыся разам са шматлікімі дзецьмі і іх бацькамі ў інтэнцыі ўсіх, хто распачынае новы навучальны і катэхетычны год.

На пачатку ўсіх прысутных прывітаў пробашч парафіі кс. канонік Павел Салабуда.

Біскуп Кашкевіч падкрэсліў, што парафія ў мікрараёне Альшанка вельмі маладая, бо ў большасці складаецца з маладых сем’яў. З гэтай нагоды ён заклікаў бацькоў памятаць пра рэлігійнае выхаванне дзяцей.

У сваю чаргу дзяцей пастыр Касцёла на Гродзеншчыне заахвоціў адкрываць свае сэрцы на Пана Бога, бо Ён з’яўляецца для кожнага чалавека першым і найважнейшым Настаўнікам.

На заканчэнне Імшы іерарх удзяліў спецыяльнае благаслаўленне дзецям і моладзі на новы навучальны і катэхетычны год. Пробашч парафіі запрасіў дзяцей і моладзь да ўдзелу ва ўроках рэлігіі, якія будуць адбывацца ў парафіі.

У другой палове дня пры парафіі былі арганізаваны для маленькіх вернікаў гульні і танцы, каб тыя маглі з добрым настроем увайсці ў новы навучальны год.

Кс. Юрый Марціновіч

23 мая, ва ўрачыстасць Спаслання Духа Святога, больш за 50 маладых людзей у парафіі Святога Духа ў Гродне (Альшанка) прынялі сакрамэнт канфірмацыі. Сакрамэнт удзяліў арцыбіскуп Тадэвуш Кандрусевіч.

Спасланне Духа Святога – галоўная ўрачыстасць у гэтай парафіі. У гэты дзень парафію наведаў арцыбіскуп Кандрусевіч, які з’яўляецца ўжо не проста яе госцем, а сапраўдным сябрам.

Настрой парафіянам не сапсавала нават благое надвор’е. На ўрачыстасці прысутнічалі таксама іншыя госці: прэфект Міждыяцэзіяльнай вышэйшай духоўнай семінарыі ў Гродне ксёндз Ян Раманоўскі, ксёндз Анджэй Ганчар, які быў дыяканам у гэтай парафіі, і ксёндз Андрэй Бялаблоцкі, яе былы вікарый, які рыхтаваў моладзь да канфірмацыі ў мінулым годзе.

У гаміліі арцыбіскуп адзначыў, што дзякуючы Спасланню Духа Святога розныя народы аб’ядналіся ў адну хрысціянскую сям’ю, якая называецца Касцёлам. Таму Пяцідзясятніца з’яўляецца і святам нараджэння Касцёла.

Іерарх дадаў, што без Святога Духа Касцёл не будзе жывым, а застанецца аморфным. Таксама хрысціянін без Святога Духа “не можа належным чынам выконваць свае абавязкі, асабліва быць сведкам Хрыста ва ўсіх жыццёвых абставінах”.

“Як у дзень Пяцідзясятніцы Святы Дух перамяніў і падбадзёрыў апосталаў, так Ён чыніць і сёння. Ён умацоўвае нас, каб жыць згодна з Божым законам, быць сведкамі Хрыста і мужна абвяшчаць Евангелле сучаснаму свету”, – сказаў арцыбіскуп.

Іерарх нагадаў галоўную мэту сакрамэнту канфірмацыі, які ўдзяляўся ў гэты дзень у парафіі, – “стаць мужнымі сведкамі Евангелля і бараніць нашу хрысціянскую веру”. “Гэта наша місія, якой патрабуе сучасны свет”, – сказаў ён.

“Дарагая моладзь! Вы прымаеце сёння сакрамэнт сталага хрысціянства. Адкрыйцеся на дзеянне Святога Духа. Не зачыняйце дзвярэй перад Ім. Дазвольце Яму духоўна змяняць вас, каб нанава вярнуцца ў стан створаных па вобразу і падабенству Божаму. Толькі духоўна зменены чалавек здольны змяняць аблічча нашай зямлі на лепшае”, – з такімі словамі звярнуўся арцыбіскуп да маладых людзей, дадаўшы, што Хрыстус чакае іх, яны з’яўляюцца надзеяй Касцёла, грамадства і свету.

Таксама ў малітве падчас Імшы памяталі пра біскупа Гродзенскага Аляксандра Кашкевіча з нагоды 30-годдзя яго біскупскага пасвячэння.

Пасля Эўхарыстыі арцыбіскуп Тадэвуш Кандрусевіч распавёў пра пажар, які нядаўна здарыўся ў будслаўскім санктуарыі. Іерарх падзякаваў за ахвяраванні, якія вернікі і людзі добрай волі прынеслі і працягваюць прыносіць на аднаўленне нацыянальнай святыні. Па яго словах, гэта выклік кожнаму з нас, а таксама знак нашай хрысціянскай тоеснасці і супольнай адказнасці за захаванне сакральнай спадчыны. “Нашыя продкі будавалі касцёлы як месца малітвы і шлях да неба. Мы не маем маральнага права іх страціць. Таму супольна адбудуем будслаўскую святыню”, – заахвоціў іерарх.

Падчас Імшы арцыбіскуп благаславіў дзяцей, якія днём раней прыступілі да Першай святой Камуніі. На заканчэнне ўрачыстасці маленькіх вернікаў чакаў канцэрт парафіяльнага дзіцячага гурту “Анёлы”, спевы, забавы і салодкія пачастункі ад святароў і сясцёр законных.

Пасля Эўхарыстыі была магчымасць паразмаўляць з арцыбіскупам і сфатаграфавацца з ім.

Наталля Лазоўская

6 верасня, у першую нядзелю восені, як і кожны год, у парафіі Святога Духа ў Гродне (Альшанка) благаслаўляліся школьныя прылады. У гэты дзень у парафію прыбыў Генеральны вікарый Гродзенскай дыяцэзіі Юзаф Станеўскі.

16 жніўня ў гродзенскую парафію Святога Духа (Альшанка) былі ўнесены рэліквіі бл. ксяндза Ежы Папялушкі, мучаніка і вялікага змагара за праўду і свабоду.

Летні час у Касцёле асацыюецца з пешымі пілігрымкамі, якія з’яўляюцца своеасаблівым спосабам евангелізацыі. Сёлета гэты час адрозніваецца ад таго, што быў у мінулыя гады.

19 сакавіка, ва ўрачыстасць св. Юзафа, на святой Імшы ўвечары ў капліцы парафіі Святога Духа ў гродзенскім мікрараёне Альшанка прысутнічала вялікая колькасць мужчын. Пасля супольнай Эўхарыстыі ўжо другі год запар адбылося выстаўленне Найсвяцейшага Сакрамэнту, падчас якога мужчыны разам памаліліся Ружанец.

7 сакавіка ў парафіі Святога Духа ў Гродне (Альшанка) прайшоў майстар-клас па маляванні пад кіраўніцтвам мастачкі Надзеі Бука. На сустрэчу былі запрошаны дзеці ад 6 да 14 гадоў.

Праект “творчая субота” дзейнічае пры маладой парафіі Святога Духа ў Гродне (Альшанка) другі год і карыстаецца папулярнасцю.

Да частай малітвы і глыбейшага ўсведамлення дзеяння Божай ласкі ў штодзённым жыцці заахвоціў Генеральны вікарый Гродзенскай дыяцэзіі біскуп Юзаф Станеўскі ў Папяльцовую сераду.

Час перад Вялікім постам здаўна лічыцца карнавальным. Таму ў парафіі Святога Духа ў Гродне (Альшанка) 16 лютага адбылася гучная забава для дзяцей.