3 снежня ў катэдры ў Гродне адбылася адпустовая ўрачыстасць у гонар галоўнага апекуна гэтага касцёла – св. Францішка Ксаверыя.

Адпустовую Імшу ў катэдральнай святыні, маці ўсіх касцёлаў Гродзенскай дыяцэзіі, узначаліў біскуп Гродзенскі Аляксандр Кашкевіч.

На малітве сабраліся святары, а таксама жыхары Гродна, каб праз заступніцтва апекуна катэдры прадставіць свае інтэнцыі Пану Богу.

У гаміліі біскуп падкрэсліў, што святога Францішка да сённяшняга дня часта называюць другім пасля апостала Паўла вестуном Евангелля, і ў гэтым шмат праўды, бо лічыцца, што гэты вялікі місіянер ахрысціў каля 20 тысяч чалавек.

“Незвычайна глыбокая вера святога Францішка Ксаверыя, яго руплівасць, працавітасць, вялікая адвага і ахвярнасць з’яўляюцца пазачасавым, заўсёды актуальным узорам для наследавання не толькі для місіянераў, але і для ўсіх хрысціян”, – дадаў іерарх.

Біскуп падкрэсліў, што кожны ахрышчаны чалавек як вызнаўца Езуса Хрыста пакліканы даваць сведчанне веры і дзяліцца ёю з тымі, да каго пасылае яго Бог.

Па словах пастыра Касцёла на Гродзеншчыне, Пан аказаў святому Францішку Ксаверыю вялікую ласку, даў яму спазнаць сваю бясконцую боскую любоў, дазволіў адкрыць, які вялікі скарб дар збаўлення, які Хрыстус дае кожнаму чалавеку.

“Жыццё святога місіянера было адказам на дар Божай любові. Гэтую любоў Францішак Ксаверый не мог захаваць для сябе, а хацеў, каб яе адкрыў і спазнаў увесь свет. Няхай гэтае жаданне адкрываць Божую любоў і дзяліцца ёю з бліжнімі ажыўляе кожнага і кожную з нас”, – сказаў іерарх.

На Эўхарыстыі біскуп Кашкевіч маліўся да Добрага Бога з просьбай аб тым, каб святы Францішак Ксаверый выпрасіў для ўсіх вернікаў дыяцэзіі ласку быць сведкамі любові Пана ў сваіх сем’ях, у месцах вучобы і працы, у супольнасці Касцёла і грамадстве.

На заканчэнне Імшы пробашч парафіі кс. канонік Ян Кучынскі падзякаваў усім за дар супольнай малітвы і ўдзел у сёлетняй адпустовай урачыстасці.

Прэс-служба Гродзенскай дыяцэзіі

Фота: Андрэй Юхнік

12 чэрвеня ў парафіі благаслаўлёнай Мар’яны Бярнацкай у Гродне адзначалася адпустовая ўрачыстасць. У гэты дзень прыпадае літургічны ўспамін апякункі парафіяльнай супольнасці.

Урачыстая Імша з гэтай нагоды прайшла на месцы спачыну расстраляных падчас Другой сусветнай вайны жыхароў Гродна і Ліпска ў Навумавічах каля Гродна, дзе ў велізарных магілах можа спачываць больш за тры тысячы чалавек, сярод якіх інтэлігенцыя, дзяржаўныя і грамадскія дзеячы, духавенства.

У іх ліку таксама Мар’яна Бярнацкая, беатыфікаваная 13 чэрвеня 1999 г. Папам Янам Паўлам ІІ у Варшаве сярод 108 мучанікаў Другой сусветнай вайны. Яна была выбрана апякункай новай парафіі ў горадзе над Нёманам.

У гонар благаслаўлёнай у Гродне будзе пабудавана новая каталіцкая святыня, што, як плануецца, стане месцам месцам малітвы асабліва ў інтэнцыі ўсіх сем’яў, каб іх члены на ўзор бл. Мар’яны былі здольныя служыць адзін аднаму.

На Эўхарыстыі ў лесе, дзе адбываліся трагічныя падзеі тых часоў, сабраліся парафіяне, якія дзякавалі ўсім сведкам веры, у тым ліку сваёй апякунцы, за іх вялікую адвагу ў простым і сціплым жыцці.

Урачыстасць пачалася спевам Літаніі да Найсвяцейшага Сэрца Езуса. Затым адбылася Імша ў інтэнцыі парафіяльнай супольнасці і яе развіцця, з просьбай, каб у бліжэйшы час была магчымасць устанавіць крыж і асвяціць пляцоўку пад будаўніцтва сваёй святыні ў цэнтры гарадскога мікрараёна Баранавічы, які імкліва развіваецца.

Імшу ўзначаліў біскуп Гродзенскі Аляксандр Кашкевіч. Іерарх падкрэсліў, што “зямля, на якой мы стаім, была акроплена крывёю шматлікіх мучанікаў падчас Другой сусветнай вайны”, “гэтая зямля з’яўляецца быццам адным вялікім рэліквіярыем, які сёння мы хочам ушанаваць, просячы заступніцтва благаслаўлёнай Мар’яны”.

Дэкан Сапоцкінскага дэканату кс. Антоні Абухоўскі ў гаміліі казаў пра важнасць служэння і прысвячэння для іншага чалавека. Святар адзначыў, што па прыкладзе апякункі парафіі трэба імкнуцца любіць кожнага і аддаваць яму сваё сэрца.

Падчас Эўхарыстыі вернікі маліліся таксама аб святасці для ўсіх сем’яў Гродзенскай дыяцэзіі, аб веры для дзяцей і моладзі, аб міры і згодзе ў кожным доме, сям’і і супольнасці.

У Імшы ўдзельнічаў таксама пробашч грэка-каталіцкай парафіі Маці Божай Фацімскай у Гродне а. Андрэй Крот.

На заканчэнне Імшы пробашч парафіі бл. Мар’яны Бярнацкай кс. Юрый Марціновіч падзякаваў усім за дар супольнай малітвы i заахвоціў сваіх парафіян углядацца ў прыклад, які пакінула благаслаўлёная. Святар падкрэсліў, што яе гераічны ўчынак, які заключаўся ў згодзе пайсці на смерць замест сваёй нявесткі, якая чакала нараджэння дзіцяці, заахвочвае сучасных людзей да канкрэтнага дзеяння.

Таму кс. Юрый пажадаў, каб благаслаўлёная была ўзорам для кожнай сям’і, каб, наследуючы яе жыццё, можна было будаваць супольнасці, заснаваныя на даверы, любові і ўзаемнай павазе.

Пасля Імшы вернікі працяглы час маліліся перад памятным крыжам, аддаючы Богу праз заступніцтва іх апякункі свае інтэнцыі і просьбы, а таксама прынесеныя кветкі са сваіх садоў.

Гэтай засяроджанасці і разважанню над уласным жыццём і тым, што можа кожны зрабіць сёння для іншага чалавека і свету, спрыялі добрае летняе надвор’е і спеў птушак.

Прэс-служба Гродзенскай дыяцэзіі

Фота: Эвеліна Лукашэвіч

«Сёлета ва ўмовах пандэміі COVID-19 магчымасць атрымання поўнага адпусту для памерлых вернікаў працягваецца на ўвесь месяц лістапад з дастасаваннем спраў і ўмоў для бяспекі вернікаў», — гаворыцца ў спецыяльным Дэкрэце Апостальскай Пенітэнцыярыі, апублікаваным 22 кастрычніка, ва ўспамін святога Яна Паўла ІІ.

22 кастрычніка ў парафіі святога Яна Паўла ІІ у Смаргоні з удзелам біскупа Юрыя Касабуцкага адзначылі адпустовую ўрачыстасць.

15 кастрычніка ў санктуарыі Гродзенскай дыяцэзіі Маці Божай Суцяшальніцы Засмучаных у Барунах (Ашмянскі дэканат) прайшла адпустовая ўрачыстасць.

7 кастрычніка ў парафіі св. Юрыя ў Варнянах (Астравецкі дэканат) адбылася адпустовая ўрачыстасць у гонар Найсвяцейшай Панны Марыі Ружанцовай. Да гэтага дня вернікі супольнасці па ініцыятыве пробашча кс. Віктара Захарэўскага рыхтаваліся з дапамогай навэнны.

З нагоды ўспаміну св. Францішка Асізскага, які Касцёл адзначае 4 кастрычніка, у парафіі св. Яна Хрысціцеля ў Гальшанах (Ашмянскі дэканат), дзе знаходзіцца абраз святога Францішка, прайшла адпустовая ўрачыстасць.

У першую нядзелю кастрычніка ў парафіі святога Уладзіслава ў Суботніках (Іўеўскі дэканат) адбылася адпустовая ўрачыстасць Маці Божай Ружанцовай. У бакавым алтары касцёла змешчаны абраз Маці Божай Ружанцовай, які вернікі асабліва ўшаноўваюць.

29 верасня ў касцёле ў Міхалішках (Астравецкі дэканат) адбылася штогадовая адпустовая ўрачыстасць у гонар св. Міхала Арханёла, галоўнага апекуна парафіі.

26 верасня касцёл святых Космы і Дам’яна ў Астраўцы сабраў на парафіяльную ўрачыстасць у гонар сваіх апекуноў вялікую колькасць вернікаў.

Святой Імшой апоўначы распачалося святкаванне адпустовай урачыстасці ў парафіі Узвышэння Святога Крыжа ў Лідзе (Фара).

8 верасня парафія Нараджэння Найсвяцейшай Панны Марыі ў Зарачанцы (Баля Касцёльная) адзначыла адпустовую ўрачыстасць.

29 чэрвеня Касцёл адзначае ўрачыстасць святых апосталаў Пятра і Паўла. У многіх святынях нашай краіны аддаецца пашана гэтым апосталам, якія стаялі ля пачаткаў Касцёла. У гэты дзень Касцёл ушаноўвае іх мучаніцтва. Святыя Пётр і Павел, хоць і прымалі цярпенне ў розны час, заўсёды былі адным.

12 чэрвеня ў новай парафіі бл. Мар’яны Бярнацкай у Гродне адбылася першая адпустовая ўрачыстасць. У гэты дзень прыпадае літургічны ўспамін апякункі парафіяльнай супольнасці.

4 сакавіка ў гродзенскім касцёле св. Францішка Ксаверыя сабраўся на малітве генеральны капітул, апекуном якой з’яўляецца святы каралевіч Казімір. Традыцыйна ў гэты дзень ушанавалі апекуна Гродзенскай дыяцэзіі.