Святой Імшой апоўначы распачалося святкаванне адпустовай урачыстасці ў парафіі Узвышэння Святога Крыжа ў Лідзе (Фара).
Узначаліў літургію пробашч парафіі кс. канонік Уладзімір Гуляй. Гамілію прамовіў пробашч парафіі Найсвяцейшай Тройцы ў Войстаме (Смаргонскі дэканат) кс. Уладзіслаў Сурвіла, які спадарожнічаў вернікам лідскай парафіі ў 40-гадзінным набажэнстве і дапамагаў ім годна падрыхтавацца да святкавання ўрачыстасці. Святар разважаў у гаміліі пра важнасць у хрысціянскім жыцці ахвярнасці і пра любоў Бога да чалавека.
На заканчэнне Эўхарыстыі адбылася традыцыйная працэсія з рэліквіямі Святога Крыжа вакол касцёла.
Парафіяльнаму фэсту папярэднічала 40-гадзіннае набажэнства. 12 і 13 верасня на працягу дня кожны меў магчымасць застацца сам-насам з Езусам на адарацыі Найсвяцейшага Сакрамэнту і памаліцца ва ўсіх сваіх патрэбах.
Ксёндз Уладзіслаў Сурвіла падчас святых Імшаў прыгадаў гісторыю св. Яна Паўла ІІ, звярнуўшы ўвагу на тое, што Папа нават у самыя цяжкія хвіліны свайго жыцця маліўся і не адыходзіў ад Бога. Таксама святар разважаў пра неабходнасць дарыць свой час Езусу і пра ахвярнасць: “Бог не хоча ад нас эмоцый, Ён хоча ад нас ахвяры. Мы прыходзім у касцёл не дзеля таго, каб паспяваць ці паслухаць, але дзеля таго, каб скласці ахвяру на алтары. Што гэта за ахвяра? Езус Хрыстус, утоены ў Найсвяцейшым Сакрамэнце”.
Скончылася 40-гадзіннае набажэнства Крыжовым шляхам, падчас якога вернікі разам з кс. Уладзіславам разважалі не толькі аб муках Хрыста, але і аб сваіх штодзённых крыжах.
Яна Чайко
