29 верасня ў касцёле ў Міхалішках (Астравецкі дэканат) адбылася штогадовая адпустовая ўрачыстасць у гонар св. Міхала Арханёла, галоўнага апекуна парафіі.
На ўрачыстай Імшы ў гістарычнай святыні, якая захапляе многіх сваёй прыгажосцю, сабраліся шматлікія парафіяне і госці. Прыбылі таксама святары з дэканату.
Пробашч кс. Анатоль Захарэўскі прывітаў прысутных і адзначыў, што гэты дзень для мясцовай парафіі з’яўляецца нагодай да асаблівай малітвы за нашу краіну і аб міры ў грамадстве.
Святую Імшу ўзначаліў кс. Томаш Мікалайчык, якому 27 чэрвеня ў катэдры св. Францішка Ксаверыя ў Гродне біскуп Гродзенскі Аляксандр Кашкевіч удзяліў прэзбітэрскае пасвячэнне. У гаміліі ён засяродзіў увагу на постаці Арханёла Міхала, які паводле традыцыі з’яўляецца абаронцам Касцёла і аберагае ад зла.
На заканчэнне Эўхарыстыі новапрэзбітэр удзяліў усім прысутным прыміцыйнае благаслаўленне.
Кс. Юрый Марціновіч