У верасні ўдзельнікі руху “Маці ў малітве” парафіі св. Яна Паўла ІІ у Смаргоні здзейснілі духоўнае падарожжа на мядзельскую Кальварыю, а таксама наведалі касцёлы ў Мядзелі, Нарачы і Вілейцы. Разам з імі ў пілігрымцы быў пробашч парафіі кс. Яўген Учкуроніс.
Пілігрымка была прымеркавана да першай гадавіны заснавання касцёльнага руху “Маці ў малітве” пры смаргонскай парафіі. Удзельнікі вырушылi ў Мядзел, каб прайсці Крыжовым шляхам у інтэнцыі нашай Радзімы i Мітрапаліта Мінска-Магілёўскага арцыбіскупа Тадэвуша Кандрусевіча з просьбай аб яго хутчэйшым вяртанні ў Беларусь.
Удзельнікі пілігрымкі ўдзячныя Богу за дар гэтага руху, які актыўна развіваецца ў парафіі. Таксама яны выказваюць удзячнасць айцам кармэлітам і членам руху “Маці ў малітве” мядзельскай парафіі за супольную малітву і гасціннасць.
Рух “Маці ў малітве” быў заснаваны ў Англіі ў 1995 годзе Веронікай Уільямс. Цяпер гэта 75-гадовая маці і бабуля, якая перад абліччам пагрозаў сучаснага свету адчула заклік да асаблівай супольнай малітвы, у якой маці давяраюць сваіх дзяцей і ўнукаў Езусу.
Рух сёння дзейнічае больш чым у 100 краінах, у тым ліку і ў Беларусі. Ён распаўсюджваецца дзякуючы асабістым кантактам і сведчанням маці. Духоўнасць руху характарызуецца поўным даверам Богу, радаснай паслухмянасцю Яму і Касцёлу.
Сведчанні з усяго свету пацвярджаюць, што Бог выслухоўвае малітвы маці і дае дзецям вялікія ласкi: здароўе, вызваленне ад залежнасцяў, нараджэнне доўгачаканых дзяцей.
Кс. Юрый Марціновіч
Фота: архіў парафіі св. Яна Паўла ІІ у Смаргоні