29 жніўня для моладзі лідскай парафіі Узвышэння Святога Крыжа (Фара) адбылася традыцыйная святая Імша на заканчэнне лета, падчас якой кс. Раман Вайцяховіч асабліва маліўся аб Божым благаслаўленні для школьнікаў і студэнтаў на новы навучальны год.
У гаміліі святар звярнуўся да словаў з рэфрэну псальму: “Божа, Цябе прагне душа мая”. Ксёндз Раман адзначыў, што маладыя людзі знаходзяцца тут, таму што яны па-сапраўднаму патрабуюць Бога ў сваім жыцці, для іх важна распачаць вучобу ад сустрэчы з Жывым Богам.
Падчас Імшы адбылася працэсія з дарамі, а на заканчэнне – малітва за Айчыну.
Пасля Эўхарыстыі моладзь удзельнічала ў адарацыі Найсвяцейшага Сакрамэнту. Прысутныя дзякавалі ў цішыні за час канікул і адпачынку, прасілі аб благаслаўленні і неабходных дарах на новы навучальны год, а таксама даручалі Богу асабістыя праблемы і просьбы.
Яна Чайко
Фота: Дзіяна Бранчэль
