22 гады ішла, а на 23-і год паехала на ровары: адбылася пілігрымка Іўеўскага дэканату ў Тракелі

Штогод на тракельскі фэст, які адбываецца ў другую пятніцу і суботу ліпеня, збіраюцца тысячы пілігрымаў. Але сёлета пандэмія каранавірусу змяніла планы вернікаў. Пілігрымкі былі адменены, а сама дыяцэзіянальная ўрачыстасць перанесена на невядомы срок.

Але кожны з нас любіць сваю Маці, да якой крочыў не адзін год, якая выслухае, дапаможа і атуліць апекай. На Іўеўшчыне цяжка знайсці католіка, які б не чуў пра “Тракелянку”. 22 гады пілігрымка да Маці Божай Тракельскай крочыла праз увесь дэканат, на працягу гэтых гадоў пілігрымы бачылі, як жылі вёскі, як аднаўлялася вера, змянялася прырода.

Гэтыя гады сведчання веры не маглі на гэтым скончыцца. 22 гады пілігрымка ішла, а на 23-і год паехала на ровары. Пандэмія не здолела зачыніць вернікаў у хатах, а дала магчымасць праявіць сваю любоў у іншым фармаце.

45 вернікаў з розных парафій Іўеўшчыны наведалі дыяцэзіянальны санктуарый 11 ліпеня. За два дні яны пабывалі ва ўсіх святынях дэканату, праехалі 135 кіламетраў і паказалі сваю любоў да Маці не адной сотні людзей.

У кожнай святыні і каля кожнага крыжа пілігрымы маліліся за жыхароў вёсак і аграгарадкоў, за родную парафію і ўсю Беларусь, прасілі Божых ласкаў для медыкаў і санітарнай службы, якія сёння становяцца героямі нашага часу, аддаючы сябе і дапамагаючы хворым.

Пілігрымы таксама зрабілі прыпынак каля барэльефа святога Яна Паўла ІІ у цэнтры Іўя, дзе прамовілі літанію да святога і памаліліся за Айчыну.

Пілігрымка прыбыла ў Тракелі ўвечары акурат перад Імшой а 19-й гадзіне. Пілігрымаў прывітаў кусташ санктуарыя ксёндз Юрый Бяганскі.

Пасля Імшы вернікі памаліліся перад цудадзейным абразом за ўсіх людзей, якіх сустракалі на сваім шляху.

Арганізатар пілігрымкі ксёндз Ян Гавецкі дзякуе за прыхільнасць і супольную працу Іўеўскаму райвыканкаму, супрацоўнікам ДАІ Іўеўскага РАУС, жыхарам вёсак Яхімаўшчына, Галімшчына, Аглоблішкі, Добавічы, Ёдзенцы і Сурвілішкі, святарам Іўеўскага дэканату.

Трэба адзначыць, што мясцовыя ўлады заўсёды прыхільна і добразычліва ставяцца да ўсіх мерапрыемстваў, якія арганізоўвае іўеўская парафія.

Раман Ярмош