5 ліпеня ў дыяцэзіяльным санктуарыі Маці Божай Каралевы нашых сем’яў у Тракелях (Радунскі дэканат) зноў сабраліся шматлікія пілігрымы. Некаторыя прыбылі на аўтамабілях, іншыя рашыліся на пешыя або роварныя пілігрымкі ў індывідуальным парадку.
Спачатку ўсе накіроўваліся ў маленькую драўляную святыню, каб прадставіць Маці Божай свае інтэнцыі і просьбы. Вернікі маліліся ў цішыні, даручаючы Каралеве нашых сем’яў усе свае сямейныя планы.
Затым на палявым алтары адбылася ўрачыстая святая Імша, якую ўзначаліў Генеральны вікарый Гродзенскай дыяцэзіі Юзаф Станеўскі.
У гаміліі іерарх адзначыў, што ў Тракелі прыбываюць шматлікія пілігрымы са сваімі просьбамі і марамі. Ён дадаў, што ў кожнага чалавека ёсць мары, а ў першую чаргу мара аб любові, згодзе ў сям’і, паслухмяных дзецях, міры ў свеце, і тракельскі санктуарый – тое месца, дзе пра гэтыя мары можна і нават трэба сказаць Маці Божай.
“Мы прыходзім сюды ў школу Марыі, каб прасіць Яе аб радзе і дапамозе”, – падкрэсліў біскуп, заахвоціўшы стаць перад цудадзейнай выявай Найсвяцейшай Панны з даверам і верай маленькага дзіцяці.
Іерарх узгадаў таксама св. Яна Паўла ІІ, стагоддзе нараджэння якога адзначаецца сёлета. Біскуп заклікаў пілігрымаў па прыкладзе Вялікага Папы цалкам аддацца Марыі, даручыць Ёй свой сённяшні і заўтрашні дзень.
Падчас Эўхарыстыі маліліся таксама ў інтэнцыі ўсіх сем’яў нашай дыяцэзіі. Тракельскі санктуарый з’яўляецца асаблівым месцам у нашым мясцовым Касцёле, дзе пастаянна адбываецца гарачая малітва за сем’і, каб яны былі моцныя Богам і будавалі сваю будучыню на хрысціянскіх каштоўнасцях.
Кс. Юрый Марціновіч
