Iмяніны біскупа Кашкевіча адзначылі ў гродзенскай катэдры

3 мая, у дзень сваіх імянін, біскуп Гродзенскі Аляксандр Кашкевіч узначаліў святую Імшу ў катэдральным касцёле св. Францішка Ксаверыя ў Гродне.

У гэты дзень прыпадала Нядзеля Добрага Пастыра, таму асаблівым чынам маліліся ў інтэнцыі пакліканняў да святарства, каб было шмат адважных, якія пойдуць за голасам Езуса Хрыста, прысвячаючы сваё жыццё людзям і Богу.

Таксама ў малітве памяталі пра святароў, якія спаўняюць служэнне ў Касцёле на Гродзеншчыне, каб Хрыстус Пан умацаваў іх у пакліканні, асвячаў сваёй ласкай і нястомна узмацняў у служэнні Божаму народу.

З той прычыны, што ў першую нядзелю мая ў Гродзенскай дыяцэзіі адзначаецца дыяцэзіяльны Дзень маці, маліліся і ў інтэнцыі ўсіх маці – жывых і памерлых.

На заканчэнне святой Імшы вернікі выказалі біскупу Кашкевічу віншаванні з нагоды імянін, жадаючы найперш здароўя і Божай ласкі, якая патрэбная для годнага спаўнення сваіх штодзённых пастырскіх абавязкаў. Таксама дзеці, як звычайна, арыгінальным спосабам выказалі свае віншаванні. Свае пажаданні іерарху склалі і студэнты тэалагічнага каледжу імя св. Казіміра.

Кс. Юрый Марціновіч