Біскуп Станеўскі ўдзяліў сакрамэнт канфірмацыі моладзі лідскай Фары

14 верасня стаў асаблівым днём для лідскай парафіі Узвышэння Святога Крыжа (Фара): акрамя таго, што адзначалася парафіяльная ўрачыстасць, дапаможны біскуп Гродзенскай дыяцэзіі Юзаф Станеўскі ўдзяліў групе моладзі сакрамэнт канфірмацыі.

На пачатку святой Імшы маладыя людзі звярнуліся да біскупа з просьбай аб удзяленні ім сакрамэнту, каб яны маглі стаць новымі цаглінкамі ў будове Касцёла на Беларусі.

Пробашч парафіі ксёндз канонік Уладзімір Гуляй прывітаў святароў і ўсіх прысутных і запэўніў іерарха ў годнай падрыхтоўцы кандыдатаў да прыняцця сакрамэнту хрысціянскай сталасці.

У гаміліі біскуп пажадаў моладзі рэалізоўваць свае планы і мроі і адзначыў, што сакрамэнт канфірмацыі – гэта моц з вышыняў, якая вельмі патрэбная моладзі на яе шляху дарослага жыцця.

Напрыканцы Імшы маладыя людзі выказалі словы падзякі святарам і сёстрам законным. Пробашч падзякаваў бацькам за выхаванне дзяцей у веры, а таксама звярнуў увагу, што мы жывём у свеце, які не спрыяе хрысціянскім каштоўнасцям, і што свабода – гэта вялікая адказнасць за сябе, Бацькаўшчыну і сям’ю. “Сапраўдная свабода ў тым, каб верыць у Бога і давяраць Яму, а для гэтага нам патрэбныя дары Духа Святога”, – сказаў святар.

Біскуп Станеўскі яшчэ раз падзякаваў бацькам і павіншаваў маладых вернікаў, нагадаўшы, што яны ўсё могуць, але павінны памятаць пра Божыя запаведзі, любоў Бога, павагу да сваіх бацькоў і паслухмянасць ім.

Удзяліўшы благаслаўленне прысутным, іерарх благаславіў крыжы і Святое Пісанне і падараваў іх кожнаму, хто ў гэты дзень адкрыўся на Духа Святога ў сакрамэнце хрысціянскай сталасці.

Яна Чайко

Фота: Артур Станулевіч