Канферэнцыя Каталіцкіх Біскупаў у Беларусі выражае глыбокую занепакоенасць фактам недапушчэння на тэрыторыю нашай краіны арцыбіскупа Тадэвуша Кандрусевіча, Мітрапаліта Мінска-Магілёўскага, Старшыні каталіцкага епіскапату Беларусі.
Сумна тое, што біскуп Каталіцкага Касцёла, які з’яўляецца пастырам даручаных яму вернікаў, быў пазбаўлены магчымасці знаходзіцца ва ўласнай дыяцэзіі і спаўняць у ёй служэнне, даверанае яму Святым Айцом.
На думку Канферэнцыі Каталіцкіх Біскупаў у Беларусі, забарона на ўезд на тэрыторыю краіны арцыбіскупу Тадэвушу Кандрусевічу, які з’яўляецца грамадзянінам Рэспублікі Беларусь, нязгодная з існуючым заканадаўствам Рэспублікі Беларусь, не спрыяе будаўніцтву канструктыўных адносін паміж дзяржавай і Каталіцкім Касцёлам у нашай краіне, не служыць змяншэнню напружання і пераадоленню глыбокіх падзелаў у грамадстве.
Канферэнцыя Каталіцкіх Біскупаў у Беларусі мае надзею, што справа недапушчэння арцыбіскупа Тадэвуша Кандрусевіча ў нашу краіну будзе ў хуткім часе высветлена і акажацца прыкрым непаразуменнем, а таксама што ў будучыні падобныя інцыдэнты не будуць адбывацца.
Канферэнцыя Каталіцкіх Біскупаў у Беларусі звяртаецца да духавенства, кансэкраваных асобаў і свецкіх вернікаў, а таксама да ўсіх людзей добрай волі, з просьбай аб руплівай малітве ў інтэнцыі як мага хутчэйшага вяртання арцыбіскупа Тадэвуша Кандрусевіча ў нашу краіну.
Ад імя каталіцкіх біскупаў Беларусі
Аляксандр Кашкевіч
Біскуп Гродзенскі
Віцэ-старшыня Канферэнцыі Каталіцкіх Біскупаў у Беларусі
Юзаф Станеўскі
Дапаможны біскуп Гродзенскай дыяцэзіі
Генеральны сакратар Канферэнцыі Каталіцкіх Біскупаў у Беларусі
Гродна, 2 верасня 2020 г.
