На вуліцах Гродна разам маліліся за краіну прадстаўнікі розных канфесій

16 жніўня ў гістарычным цэнтры Гродна разам сабраліся на малітве духавенства і вернікі хрысціянскіх Цэркваў: праваслаўныя, католікі, уніяты, пратэстанты, прадстаўнікі евангельскай і іўдзейскай рэлігійных супольнасцяў.

У гэты цяжкi для ўсіх час яны ў адзін голас прасілі Бога за нашу краіну, якая нагадвае сёння ўзбуранае мора. Яны маліліся за мірнае вырашэнне ўсёй сітуацыі і вызваленне нявінна затрыманых у Беларусі.

Прадстаўнікі розных канфесій нагадалі аб важнасці ўзаемнага прабачэння, навяртання і жыцця па Божых запаведзях.

Малітоўнае шэсце пачалося ад каталіцкай катэдры св. Францішка Ксаверыя. Затым удзельнікі прайшлі да сімвалічнага месца, дзе калісьці стаяла Фара Вітаўта, узарваная ў 1961 г. Потым яны спыніліся ля ўваходу ў гродзенскае гета, а скончылася малітва ля будынка харальнай сінагогі.

“Мы вельмі рады, што тая ініцыятыва якая паўстала за адзiн дзень, змагла аб’яднаць вернікаў розных хрысціянскіх і яўрэйскіх суполак і грамадскіх арганізацый горада Гродна. У гэты складаны час будзем працягваць разам маліцца аб міры і аб перамозе ад Госпада для ўсёй Беларусі!” – дзеляцца адны з арганізатараў малітоўнай ініцыятывы Яўген i Таццяна Калодзіны з міжканфесійнага іўдзейска-хрысціянскага служэння #Шомэр-Інтэрнэшнл.

Супольная малітва паказала, што ўсім хрысціянам важна тое, каб наша краіна была шчаслівая, а людзі, якія жывуць у ёй, маглі адчуваць сябе ў бяспецы. Усе яе ўдзельнікі заклапочаны тым, каб у Беларусі запанавалі жаданы мір, еднасць і згода.

Кс. Юрый Марціновіч

Фота: Эвеліна Лукашэвіч