У сувязі з сітуацыяй у свеце і ў нашай краіне, калі пашыраецца эпідэмія каранавірусу, Каталіцкі Касцёл прысвеціць Беларусь Беззаганнаму Сэрцу Марыі.

Гэтая прапанова, з якой выступіў старшыня епіскапату Беларусі арцыбіскуп Тадэвуш Кандрусевіч, будзе рэалізавана ва ўрачыстасць Звеставання Пана, 25 сакавіка.

Матывам да прыняцця такога рашэння стаў заклік Святога Айца Францішка да ўсіх хрысціянаў ва ўрачыстасць Звеставання Пана 25 сакавіка 2020 г. у 12.00 разам прамовіць малітву “Ойча наш” у інтэнцыі выбаўлення свету ад заразнай хваробы каранавірусу.

Заклік Папы з’яўляецца заахвочваннем да малітоўнай салідарнасці.

25 сакавіка ў катэдральным касцёле св. Францішка Ксаверыя ў Гродне, у санктуарыях Гродзенскай дыяцэзіі, a таксама, паводле разважлівага меркавання пробашчаў, у іншых касцёлах у 11.30 будзе арганізавана адарацыя Найсвяцейшага Сакрамэнту.

Напрыканцы адарацыі будзе прачытаны Акт прысвячэння Беларусі Беззаганнаму Сэрцу Марыі. Апоўдні, згодна з пажаданнем Папы Францішка, будзе прамоўлена малітва “Ойча наш”. Потым будзе ўдзелена благаслаўленне Найсвяцейшым Сакрамэнтам прысутным вернікам і ўсёй Беларусі, благаслаўляючы на чатыры бакі свету.

Да духоўнага ўдзелу ў гэтай ініцыятыве запрашаюцца ўсе вернікі Гродзенскай дыяцэзіі, каб Пан Бог праз рукі Найсвяцейшай Панны Марыі захаваў свет ад гэтай пагрозы, якая забірае чалавечае жыццё паўсюль.

Усе запрашаюцца ў гэты прапанаваны час, нягледзячы на штодзённыя заняткі, уключыцца ў супольную малітву, якая так патрэбна лекарам, санітарам і ўсім медработнікам, а таксама працаўнікам шпіталяў, асабліва інфекцыйных, дзе здзяйсняецца самая вялікая барацьба з новай пагрозай. Малітва патрэбна ўсім, хто змагаецца з наступствамі гэтай эпідэміі.

У сябе дома можна індывідуальна прамовіць Акт прысвячэння Беларусі Беззаганнаму Сэрцу Марыі ў небяспецы пандэміі каранавірусу. 

Акт прысвячэння па-беларуску

Акт прысвячэння па-польску

Кс. Юрый Марціновіч