Ва ўрачыстасць Маці Божай Кангрэгацкай у гродзенскай катэдры падчас святой Імшы быў урачыста адкрыты і асвечаны галоўны алтар. Перад урачыстай святой Імшой адбылася медыйная прэзентацыя, у якой была прадстаўлена ўся гісторыя катэдры і галоўнага алтара. Эўхарыстыю ўзначаліў кс. абп Тадэвуш Кандрусевіч. Разам з ім св. Імшу цэлебравалі ўсе біскупы Беларусі, а таксама вялікая колькасць святароў з дыяцэзіі і з па-за яе межаў. На св. Імшу прыбыло шмат вернікаў, а таксама прадстаўнікі дыпламатычных корпусаў і дзяржаўных улад. На пачатку Эўхарыстыі кс. бп Аляксандр Кашкевіч прывітаў усіх сабраных гасцей, і прыгадаў вернікам гэтыя цяжкія гады аднаўлення алтара. Кс. бп Аляксандр падкрэсліў, што сёння гэты цудоўны алтар у катэдры з’яўляецца “адлюстраваннем прыгажосці нашай душы”. Дзякуючы Міністэрствам культуры Беларусі і Польшчы, усім людзям добрага сэрца, а таксама ксяндзу Яну Кучыньскаму за праробленую працу па аднаўленні алтара, пастыр запрасіў усіх да малітвы. Падчас гаміліі кс. абп Тадэвуш Кандрусевіч аддаў пад апеку Маці Божай Кангрэгацкай увесь Гродзенскі Касцёл, які перажывае сваё 20-годдзе. Метрапаліт сказаў: “Касцёл сёння з’яўляецца “салонам прыгажосці” кожнага чалавека. Чалавека, які вельмі часта губляецца ў сучасным свеце. Маці Божая кожнаму з нас сёння паказвае дарогу да Сына”.Урачыстасць упрыгожыў сваім спевам хор з Вішняўца “Cantate Domini”. На заканчэнне св. Імшы кс. Ян Кучыньскі падзякаваў усім сабраным за духоўны і матэрыяльны ўклад у гэту вялікую справу аднаўлення алтара, а таксама заахвоціў вернікаў да штодзённага наведвання і малітвы ў катэдры, дзе на працягу ўсяго дня выстаўлены Найсвяцейшы Сакрамант. Акрамя гэтага, пробашч парафіі ўручыў памятныя падзякі і дыпломы ўсім тым, хто садзейнічаў аднаўленню алтара. Таксама былі прачытаны віншавальныя лісты ад Міністраў культуры Беларусі і Польшчы. “Гэта “Te Deum” Гродзенскага Касцёла” – сказаў кс. абп Тадэвуш Кандрусевіч. На заканчэнне літургіі пастырамі Беларусі было ўдзелена блаславенне.
