Біскуп Кашкевіч удзяліў сакрамэнт канфірмацыі ў Воранаве

24 кастрычніка біскуп Гродзенскі Аляксандр Кашкевіч наведаў парафіяльную супольнасць святых апосталаў Сымона і Юды Тадэвуша ў Воранаве (Радунскі дэканат).

Падчас Імшы з захаваннем асноўных правіл гігіены група моладзі і вернікаў гэтай парафіі, а таксама суседняй парафіі Найсвяцейшай Тройцы ў Германішках прыняла сакрамэнт хрысціянскай сталасці.

Атрымалі ў гэты дзень дары Духа Святога і абавязаліся мужна вызнаваць веру і паступаць паводле яе прынцыпаў 68 чалавек.

Біскуп Кашкевіч, звяртаючыся да тых, хто прымаў сакрамэнт, падкрэсліў, што кожны павінен быць місіянерам у сваім асяроддзі, месцы вучобы і працы. Іерарх адзначыў, што гэты абавязак абвяшчэння Евангелля сваім жыццём, словам і ўчынкам ляжыць на кожным чалавеку, бо ад кожнага залежыць, ці будзе сёння Бог прысутнічаць у свеце і грамадстве.

Пробашч воранаўскай парафіі кс. Андрэй Вітэк SAC падзякаваў біскупу за дар супольнай малітвы і ўдзяленне сакрамэнту і запэўніў, што парафія памятае пра пастыра Гродзенскай дыяцэзіі ў малітвах.

У Імшы ўдзельнічалі сведкі канфірмацыі, якія з’яўляюцца паручыцелямі падчас яе прыняцця і прадстаўнікамі супольнасці Касцёла і павінны быць для тых, хто прыступае да канфірмацыі, узорам згоднага з верай жыцця, бацькі тых, хто прымаў сакрамэнт, і святары, у тым ліку пробашч парафіі ў Германішках кс. Дзяніс Крываносаў SAC.

Кс. Юрый Марціновіч

Фота: с. Наталля Дрэмо SAC, Карына Сарэла