29 верасня, у свята святых Арханёлаў Міхала, Габрыэля і Рафала, у Вышэйшай духоўнай семінарыі ў Гродне адзначылі ўрачыстасць яе нябеснага апекуна – арханёла Міхала.
Урачыстая Імша, цэлебрацыю якой узначаліў Генеральны вікарый Гродзенскай дыяцэзіі біскуп Юзаф Станеўскі, сабрала ў семінарыйнай капліцы ўсіх выхаваўцаў і студэнтаў гэтай навучальнай установы.
У гаміліі іерарх нагадаў, што арханёл Міхал – нябесны заступнік не толькі семінарыі ў Гродне, але і ўсёй беларускай касцёльнай правінцыі. Таксама ён адзначыў ролю, якую адыгрываюць арханёлы ў духоўным жыцці семінарыстаў і ўсіх хрысціянаў.
Па словах біскупа, менавіта яны з'яўляюцца памочнікамі, на якіх варта спадзявацца на шляху да святарства.
„Арханёл Міхал абараняе нас ад зла, арханёл Габрыэль – той, хто перадае чалавеку Божае Слова, а Рафал мае моц аздаравіць нас не толькі ад цялесных, але і ад духоўных хвароб”, –сказаў Генеральны вікарый Гродзенскай дыяцэзіі.
Арцём Кір’янаў
Фота: Павел Леановіч
