26 ліпеня ў парафіі святых Сымона і Юды Тадэвуша ў Лаздунах (Іўеўскі дэканат) святкавалі ўрачыстасць св. Яўхіма і св. Ганны. Абраз святой Ганны знаходзіцца ў лаздунскім касцёле і ўшаноўваецца вернікамі.
Госцем урачыстасці быў ксёндз-місіянер Анджэй Ганчар. Пробашч парафіі ксёндз Анджэй Бурак запрасіў яго невыпадкова, таму што абодва святары ведаюць адзін аднаго даўно і паходзяць з парафіі Узвышэння Святога Крыжа ў Лідзе (Фара).
Святочная Імша распачалася апоўдні. На пачатку пробашч сардэчна прывітаў перш за ўсё святара, а пасля ўсіх прысутных, якія прыбылі, каб падзяліць з парафіянамі радасць святкавання і ўшанаваць святых апекуноў гэтага дня.
Пробашч зазначыў, што той, хто жыве ў іншай мясцовасці і сёння прыехаў у сваю родную парафію, не з’яўляецца госцем. Дзверы роднага касцёла заўсёды адчынены для кожнага.
Святая Імша цэлебравалася ў некалькіх інтэнцыях: ксёндз-місіянер маліўся ў інтэнцыі ўсёй лаздунскай парафіі, пробашч – аб хутчэйшым спыненні пандэміі каранавірусу ва ўсім свеце, за ўсю службу аховы здароўя, за дабрадзеяў, усіх людзей добрай волі і імяніннікаў гэтага дня.
На пачатку гаміліі ксёндз-місіянер задаў пытанне: “Кім з’яўляецца святая Ганна?” Вядома, адказ не прымусіў доўга чакаць і вернікі адказалі, што гэта маці Найсвяцейшай Панны Марыі.
Асноўная частка гаміліі была прысвечана маме, бо гэта самы дарагі чалавек, да якога можна звярнуцца ў любую хвіліну нашага жыцця. Святар заахвоціў прысутных шанаваць бацькоў, бабуляў і дзядуляў і ахінуць іх сваёй малітвай.
Таксама кс. Анджэй Ганчар распавёў пра сваё служэнне на місіях у Казахстане і Камеруне, падзяліўся цікавымі звесткамі з жыцця ў гэтых краінах. Напрыканцы верасня святар плануе працягнуць місіянерскае служэнне, на гэты раз у Цэнтральнай Афрыканскай Рэспубліцы.
Напрыканцы Імшы ксёндз Анджэй Ганчар падзякаваў за запрашэнне і сказаў, што лаздунская парафія назаўсёды застанецца ў яго сэрцы. Таксама ён папрасіў аб малітве, каб яго місіянерскае служэнне прынесла добры плён.
Імша завяршылася перад выстаўленым Найсвяцейшым Сакрамэнтам літаніяй да Маці Божай, актам штодзённага аддання св. Юду Тадэвушу і суплікацыяй “Святы Божа”.
Пасля благаслаўлення Найсвяцейшым Сакрамэнтам адбылося благаслаўленне ўсіх механічных сродкаў руху.
Падчас благаслаўлення пробашч знайшоў хвілінку, каб крыху паразмаўляць з кожным уладальнікам сродкаў руху. Ад узрушанасці і неспадзяванасці твары людзей засвяціліся ўсмешкамі, у некаторых былі на вачах слёзы радасці.
Удзельнікі ўрачыстасці, падмацаваныя Божым словам, поўныя радасці і бадзёрасці, вярталіся з яе з жаданнем распаўсюджваць дабро, якое паходзіць ад Бога, ва ўсіх сферах свайго жыцця.
Кс. Анджэй Бурак
Фота: Уладзімір Юруш