Гістарычная падзея ў лідскай Фары: дзве прыміцыйныя Імшы

28 чэрвеня ў парафіі Узвышэння Святога Крыжа ў Лідзе (Фара) адбылася гістарычная падзея: два новапрэзбітэры цэлебравалі прыміцыйныя Імшы.

Сыны лідскай зямлі – кс. Андрэй Струкель і кс. Тамаш Мікалайчык – сабралі ў роднай святыні незвычайную колькасць людзей. На першую Імшу да кожнага са святароў прыйшлі родныя, сябры, святары і семінарысты, сёстры законныя і вернікі парафіі. 

Урачыстасці пачыналіся каля плябаніі, адкуль прыміцыянты разам з працэсіяй верных пад спеў ішлі да касцёла, дзе перад цэнтральнай брамай іх чакаў пробашч ксёндз канонік Уладзімір Гуляй. 

Распачыналіся Імшы благаслаўленнем бацькоў і словамі прывітання ад пробашча, для якога гэты дзень быў па-асабліваму радасным. 

У гаміліях да ксяндзоў Андрэя і Тамаша звярнуліся запрошаныя імі святары: а. Андрэй Агель SP і кс. Юрый Ясевіч. Яны нагадалі прыміцыянтам аб важнасці святарскага служэння, аб цяжкасцях і радасцях, якія сустрэнуцца на іх шляхах. Айцец Андрэй і ксёндз Юрый узгадвалі гісторыі з пачатку свайго святарства, успаміналі прыклады святых святароў і звярталіся таксама да ўсіх прысутных, нагадваючы важнасць малітвы за прэзбітэраў і аб пакліканнях. На заканчэнне гаміліі святары выказалі новапрэзбітэрам словы віншаванняў.

Для ўсёй парафіяльнай супольнасці было вялікай радасцю, што ажно два браты адказалі “так” на заклік Пана. Таму віншаванні новапрэзбітэры пачулі ад дзяцей, моладзі і іншых парафіян, сяброў, родных, супольнасці “Маці ў малітве”, семінарыстаў.

Перад благаслаўленнем ксяндзы Андрэй і Тамаш выказалі падзяку – у першую чаргу Богу за дар жыцця і паклікання; потым бацькам, родным, пробашчу і прысутным святарам, сёстрам законным і семінарыстам, моладзі, сябрам і ўсім прысутным вернікам. 

На заканчэнне новапрэзбітэры ўдзялілі папскае благаслаўленне ўсім сабраным, а потым прыміцыйнае благаслаўленне бацькам, сёстрам і братам, святарам, кансэкраваным асобам і ўсім вернікам. У сувязі са складанай эпідэміялагічнай сітуаціяй ускладанне далоняў было адменена, замест яго было агульнае благаслаўленне.

Ксёндз Андрэй Струкель нарадзіўся 19 лістапада 1993 года. 

Ксёндз Тамаш Мікалайчык нарадзіўся 1 красавіка 1996 года.

Прэзбітэрскае пасвячэнне атрымалі 27 чэрвеня 2020 года ў гродзенскай катэдры з рук біскупа Аляксандра Кашкевіча.

Яна Чайко

Фота: Яна Чайко, Артур Станулевіч