Велікапосная пастырская сустрэча святароў Гродзенскай дыяцэзіі прайшла ў Гродне

3 сакавікa ў будынку Вышэйшай духоўнай семінарыі ў Гродне прайшла велікапосная пастырская сустрэча святароў, якія служаць на тэрыторыі Гродзенскай дыяцэзіі.

У межах сустрэчы адбылося набажэнства Крыжовага шляху, падчас якога прысутныя перапрашалі Бога за ўсе свае штодзённыя грахі і занядбанні. Святары не толькі цярпліва спадарожнічаюць тым, хто ўпаў, хто шукае разумення, суцяшэння і падтрымкі ў чалавечай слабасці, але і змагаюцца, стараючыся паўстаць з уласных упадкаў. Разважанні Крыжовага шляху падрыхтаваў духоўны айцец святароў Гродзенскай дыяцэзіі а. Андрэй Шчупал CSsR.

Быў час на адарацыю Найсвяцейшага Сакрамэнту, індывідуальную і супольную, калі сабраныя даручалі Богу праз заступніцтва св. каралевіча Казіміра, дадатковага апекуна Гродзенскай дыяцэзіі, напярэдадні яго літургічнага ўспаміну ўсю дыяцэзію і ўсіх, хто яе ўтварае.

Цэнтральным пунктам была святая Імша, якую ўзначаліў біскуп Гродзенскі Аляксандр Кашкевіч. Прысутнічаў таксама дапаможны біскуп дыяцэзіі Юзаф Станеўскі.

У гаміліі канцлер Гродзенскай курыі кс. канонік Аляксандр Мацкевіч прапанаваў святарам адказаць на пытанне, ці сілкавала глебу сэрцаў Слова, якое нястомна скіроўвае Пан Бог, і ці прыносіла жаданыя плёны.

Канцлер курыі заўважыў, што святары штодзённа маюць справу з Божым словам, абвяшчаюць яго вернікам, тлумачаць і заахвочваюць людзей да перамянення жыцця. “Наш Нябесны Айцец штодзённа чакае нас, запрашае да поўнай любові размовы і паступова адкрывае сабе шлях да нашых сэрцаў”, – дадаў кс. Мацкевіч.

Ён падкрэсліў, што Божае слова заўсёды жывое і паспяховае, хоць дзейнічае часта ціхім і нават незаўважным чынам. “Няхай Дух Святы ўчыніць, каб мы прымалі гэтае Слова адкрытым, ахвочым сэрцам і дазвалялі яму заспакойваць нашы найглыбейшыя прагненні і сум”, – пажадаў святар.

Сустрэча завяршылася супольным абедам, а таксама азнаямленнем сабраных з падзеямі, якія ў найбліжэйшы час адбудуцца ў Гродзенскай дыяцэзіі. 

Кс. Юрый Марціновіч

Фота: Аляксандра Шчыглінская