Біскуп Гродзенскі ўзначаліў працэсію Божага Цела ў Навагрудку

23 чэрвеня біскуп Гродзенскі Аляксандр Кашкевіч прыбыў у Навагрудак, каб узначаліць працэсію Божага Цела вуліцамі горада. Такая значная падзея была прымеркавана да ўрачыстасці Найсвяцейшага Цела і Крыві Хрыста, якую Каталіцкі Касцёл у гэтым годзе адзначаў 20 чэрвеня.

Спачатку ў санктуарыі Гродзенскай дыяцэзіі бл. Марыі Стэлы і яе 10 паплечніц, мучаніц з Навагрудка, біскуп узначаліў святую Імшу. На ёй сабраліся жыхары горада, сёстры назарэтанкі, якія шмат гадоў звязаны з Навагрудкам, і шматлікія госці.

У гаміліі пастыр Гродзенскай дыяцэзіі падкрэсліў, што ў свята Божага Цела духоўная рэчаіснасць бачным, а разам з тым сімвалічным чынам пераносіцца ў месца, якое звычайна не асацыюецца ў нас з Богам і малітвай.

“Пан Езус, утоены ў Найсвяцейшым Сакрамэнце, пакідае табэрнакулюм, выходзіць з касцёлаў і капліц, праходзіць між дамоў, установаў, ідзе каля крамаў, рэстаранаў, прыпынкаў”, – дадаў іерарх. Па яго словах, дарогі, па якіх штодзённа спяшаюцца натоўпы людзей, вуліцы, якімі едуць машыны і аўтобусы, у гэты выключны дзень становяцца месцам малітвы, публічнага праслаўлення Бога і вызнавання веры.

“Працэсія Божага Цела нагадвае нам, што ў нашым жыцці існуе штосьці большае за часовыя справы, што Бог сапраўды прысутны ў свеце. Што ў нашай вандроўцы праз жыццё мы не адны, бо Хрыстус да канца нас палюбіў і, уваходзячы на нашы шляхі, зрабіў іх таксама сваімі шляхамі”, – сказаў біскуп.

Іерарх падкрэсліў, што сёння кожны можа спаткаць Хрыста на шляху свайго жыцця і кожны запрошаны пачуць у сваім сэрцы прарочыя словы св. Яна Паўла ІІ, якімі ён распачаў свой пантыфікат: “Не бойцеся! Адчыніце дзверы Хрысту!”

Біскуп заахвоціў вернікаў не баяцца адчыніць Хрысту дзверы свайго сэрца, бо Ён прыходзіць да чалавека з любоўю, прыходзіць як дар з самога сябе.

Пасля Імшы адбылася эўхарыстычная працэсія вуліцамі Навагрудка. Яна спынялася ля чатырох алтароў, перад якімі вернікі перапрашалі за грахі, скіроўвалі да Бога свае просьбы і дзякавалі Яму, схаванаму ў Найсвяцейшым Сакрамэнце, за ўсё дабро, якое атрымліваюць кожны дзень.

Працэсія скончылася ў цэнтры горада каля касцёла св. Міхала Арханёла.

Падчас візіту ў Навагрудак Біскуп Гродзенскі асвяціў пры ўваходзе ў касцёл Перамянення Пана памятную табліцу з надпісам, што гэтая святыня ўстаноўлена санктуарыем бл. Марыі Стэлы і яе 10-ці паплечніц, мучаніц з Навагрудка.

Kс. Юрый Марціновіч