Умілаваныя ў Хрысце Пану браты і сёстры, арганісты, дырыжоры, спевакі і кіраўнікі дарослых, дзіцячых і моладзевых хораў!
Сёння Касцёл святкуе дзень сваёй нябеснай апякункі, святой Цэцыліі – жанчыны, у сэрцы якой песня веры не сціхала нават тады, калі зямля пад нагамі дрыжала ад пакут. Гэтая святая стала для нас знакам таго, што музыка можа ўзвышаць дух нават у самыя цяжкія хвіліны.
Музыка – гэта малітва, узнесеная голасам стварэння
Музыка нараджаецца не толькі праз выкананне твораў. Яна нараджаецца ў сэрцы. Яна становіцца часткай Літургіі, калі ператвараецца ў малітву. Другі Ватыканскі Сабор кажа: “Musica sacra pars necessaria vel integralis Liturgiae est” – “Святая музыка – неабходная і неад’емная частка Літургіі”. Гэта значыць, што музыка не ўпрыгожвае Літургію, музыка служыць ёй. Кожная нота павінна быць малітвай, кожны спеў – ахвярай, кожны акорд – дыханнем веры.
Арганісты – вартавыя прыгажосці Божага дома
Асаблівую ўдзячнасць сёння хачу выказаць арганістам. Вы – нібы вартавыя, якія стаяць на хорах і ахоўваюць прыгажосць Божага дома. Кожны ваш рух, кожнае дакрананне да клавіш – гэта заклік да малітвы. Вашая праца нябачная, але незаменная. Вы ведаеце, што Літургія пачынаецца не са слоў, а з гуку, з першага акорда, з першага ўздыху вашай музыкі. Частая стома, цяжкія ўмовы, халодныя хоры, няспраўныя інструменты, абмежаваны час рэпетыцый – усё гэта вы пераадольваеце з любові да Бога. Як ваш біскуп, кажу вам ад усяго сэрца: дзякуй вам за вернасць, за стрыманасць, за пакору, з якой вы служыце Богу.
Роля хору – аб’яднаць супольнасць у адным сэрцы
Дарагія ўдзельнікі нашых дарослых парафіяльных хораў! Хор – гэта жывы арганізм. Галасы зліваюцца ў адно цела, кожны ўносіць сваю красу ў агульную гармонію. Хор вучыць нас, што Касцёл – гэта супольнасць. Ніхто не спявае сам. Кожны спявае так, каб паслухаць іншага. Гэта школа слухання, пакоры і любові. Калі хор спявае “Хвала на вышынях Богу” або “Баранку Божы”, гэтыя словы гучаць не толькі з вуснаў – яны гучаць з сэрцаў. Гэта не проста музыка – гэта дотык да нябёсаў.
Дзеці і моладзь – музычны сад Касцёла
Дарагія дзеці і моладзь! Вы наша асаблівая радасць. Вашы галасы чыстыя, як крыніца. Калі вы спяваеце, у касцёле становіцца светла і радасна. Вы вучыце нас простай, сардэчнай малітве. Вы дапамагаеце дарослым зноў адчуць, што Бог – гэта любоў. Дзякуй кіраўнікам дзіцячых хораў, бацькам, катэхетам – усім, хто падтрымлівае гэта прыгожае служэнне. Няхай вашае жыццё будзе як мелодыя, поўная святла, радасці і чысціні.
Музычнае служэнне – шлях святасці
Музыкант Касцёла пакліканы не толькі спяваць. Ён пакліканы жыць так, як спявае. Пакора, чысціня сэрца, малітва, адзінства – гэта ноты, з якіх складаецца ваша духоўнае жыццё. Калі вы граеце, няхай першым слухачом будзе Бог.
Дарагія сябры! Вы голас нашай дыяцэзіі. Вы музыка веры ў нашых парафіях. Вы тыя, хто дапамагае людзям адчуць прысутнасць Бога. Сёння хачу сказаць вам: дзякуй за кожны спеў, за кожную рэпетыцыю, за кожны дзень вашай вернасці. Прашу вас: не пакідайце гэтае служэнне. Касцёлу патрэбен ваш голас. Благаслаўляю вас і вашыя хоры, вашыя галасы і інструменты, вашыя сем’і і вашыя сэрцы. Няхай святая Цэцылія ахоўвае вас, каб кожная нота вашага жыцця была поўная Божага святла.
З любоўю і пастырскім благаслаўленнем, ваш біскуп Уладзімір
Гродна, 22.11.2025
