Дарагія маладыя сябры! Улюбёныя сыны і дочкі Касцёла ў Беларусі!
У гэты святочны дзень, калі Касцёл ва ўсім свеце праслаўляе Хрыста як Валадара Сусвету, я звяртаюся да вас – да сэрца беларускай моладзі – з асаблівай радасцю і надзеяй. Гэты год адзначае 40-ы юбілей Сусветных дзён моладзі, і мы разважаем над словамі Езуса: “Але і вы сведчыце, бо вы ад пачатку са Мною” (Ян 15, 27).
Гэтыя словы становяцца для нас не толькі духоўным дэвізам, але і даручэннем Хрыста, Які давярае вам, маладому Касцёлу, вялікую місію – быць Яго сведкамі ў сучасным свеце.
“Ты ад пачатку са Мною” – і ў гэтым твая годнасць.
Святы Айцец Леў XIV, звяртаючыся ў гэтым годзе да моладзі, нагадвае, што першасная ісціна нашай веры – гэта не тое, што мы робім для Бога, але тое, што Бог робіць для нас, калі кліча: “заставайся са Мною”. Быць з Хрыстом значыць: дазволіць Яму глядзець у глыбіню вашага сэрца, прыняць Яго прысутнасць у вашых ранах, пытаннях і сумненнях, адкрыцца на Яго любоў, якая не асуджае, але падымае, умацоўвае і вучыць вернасці.
Ніхто не здольны забраць у вас годнасці, якую дае Хрыстус. Ні страх, ні слабасць, ні памылкі. Ён кажа: “Ты Мой, Я з табою” – і ў гэтым пачынаецца шлях сапраўднага жыцця.
“Вы таксама сведчыце” – не абяцанне, а даручэнне.
Хрыстус не баіцца даверыць сваю справу маладым. Ён робіць гэта ўжо дзве тысячы гадоў, і вашае пакаленне – не выключэнне. Сведчыць – гэта не толькі гаварыць пра Бога, але: жыць праўдай, калі свет часта прапануе фальш; выбіраць дабро, нават калі яно патрабуе ахвяры; заставацца людзьмі павагі, калі іншыя выбіраюць агрэсію; праяўляць міласэрнасць, калі сэрца хоча закрыцца; быць сумленнымі, калі іншыя лёгка згаджаюцца на кампрамісы сумлення.
Сведчанне пачынаецца там, дзе вашае жыццё становіцца прамяністым люстэркам Хрыста.
Моладзь – асяроддзе, у якім Бог піша сваю гісторыю.
Дарагія юнакі і дзяўчаты! Вы не толькі частка Касцёла, вы яго жывое сэрца. Менавіта ў вас Бог абуджае новыя задумы, новыя шляхі, новыя спосабы служэння. Можа, хтосьці з вас сёння перажывае цяжкасці, адчувае пустэчу, нявызначанасць або самотнасць. Памятайце: у гісторыі многіх святых і благаслаўлёных час цемры станавіўся часам сустрэчы з Богам, Які запальваў іх новую дарогу.
Свету патрэбна ваша свежасць, чысціня сэрца, шчырасць пошуку, здольнасць марыць, вера, якая не баіцца рызыкаваць дзеля Евангелля.
Сведчанне ў свеце, якому патрабуецца надзея.
Мы жывём у час хуткіх змен, напружанняў, культурных выклікаў і духоўных сумненняў. Свет часта прапануе простыя, але пустыя адказы. Аднак менавіта ў гэтым свеце Бог ставіць вас як знак надзеі. Вы можаце быць такой надзеяй, калі падтрымліваеце сябра, які падае духам; калі адмаўляеце злосці і нянавісці; калі выбіраеце прабачэнне; калі з павагай ставіцеся да жыцця; калі не саромеецеся малітвы і веры; калі не адмаўляецеся ад сваіх хрысціянскіх каштоўнасцяў.
Свету патрэбна ваша адвага і ваша святло.
Дарагая моладзь Беларусі!
Сучаснасць і асабліва будучыня нашай зямлі – у вашых сэрцах, вашай веры, вашай чысціні, вашай здольнасці выбіраць дабро. Касцёл у Беларусі бачыць у вас вялікі дар і вялікі патэнцыял. Вы пакаленне, здольнае злучыць традыцыі нашай гісторыі з новым дыханнем Духа Святога. Не бойцеся адкрываць Евангелле, быць актыўнымі ў парафіях, шукаць сваё пакліканне, служыць і дзяліцца верай.
Хрыстус кліча вас сёння, цяпер, не “калісьці”.
Марыя – Маці кожнай маладой душы.
Няхай Найсвяцейшая Панна Марыя, якая заўсёды была блізкай да маладых сэрцаў, вядзе вас да свайго Сына. Яна – Маці чысціні, Маці надзеі, Маці дарогі. У Яе руках вашы страхі могуць стаць даверам, а вашы мары – Божай справай. Даручаю вас усіх Яе матчынаму заступніцтву.
Дарагія мае маладыя сябры!
“Але і вы сведчыце, бо вы ад пачатку са Мною” – няхай гэтыя словы стануць вашым штодзённым натхненнем. Няхай яны вядуць вас да смеласці быць Божымі, быць сапраўднымі, быць людзьмі святла. Няхай Хрыстус, Валадар Сусвету, апякуецца і валадарыць у кожным з вас, умацоўвае ў веры, накіроўвае вашыя крокі і напаўняе вашыя сэрцы сваёй радаснай і вызваляючай любоўю.
З пастырскай любоўю і благаслаўленнем,
Ваш біскуп Уладзімір
