30 верасня ў Астраўцы святкавалі юбілеі 550-годдзя ўтварэння парафіі, 200-годдзя святыні, 100-годдзя вяртання католікам касцёла святых Космы і Дам’яна.
Урачыстасці працягваліся ў парафіі ўвесь дзень. У праграме былі святыя Імшы, малітва за пажылых і хворых, дзяцей і моладзь, сем’і, працаўнікоў службы аховы здароўя, урачоў і фармацэўтаў, чыімі апекунамі з’яўляюцца святыя Косма і Дам’ян, а таксама канцэрты і феерверкі.
У 1458 г. у Астраўцы была заснавана каталіцкая парафія. Парафіяльная святыня, якая ў сваёй гісторыі перажывала розныя падзеі і нейкі час належала праваслаўным, сёння захапляе сваёй прыгажосцю. У 2016 г. Пастановай Савета Міністраў РБ касцёлу нададзены статус гісторыка-культурнай каштоўнасці Беларусі рэлігійнага значэння.
Дзякаваць за ўчора, адкрывацца на сёння
Урачыстую юбілейную Імшу за дар парафіяльнай супольнасці і святыні ўзначаліў біскуп Гродзенскі Аляксандр Кашкевіч. У літургіі ўдзельнічалі таксама дапаможны біскуп Гродзенскай дыяцэзіі Юзаф Станеўскі і дапаможны біскуп Мінска-Магілёўскай архідыяцэзіі Юрый Касабуцкі. Прысутнічала вялікая колькасць святароў, прадстаўнікі раённай улады, вернікі, госці.
Усіх прывіталі прадстаўнікі парафіі і пробашч кс. канонік Юзаф Багдзевіч.
У гаміліі біскуп Юзаф Станеўскі адзначыў, што “не было б гэтай падзеі, калі б не прысвячэнне чалавечых сэрцаў, сэрцаў вашых бацькоў, якія слухалі Божае слова і сустракалі Хрыста ў сакрамэнтах Касцёла”.
“Калі мы ўсведамляем багацце мінулага, усё дабро, спадкаемцамі якога сталі, то калені самі згінаюцца, каб укленчыць, а сэрцы спяваюць “Цябе, Божа, праслаўляем” за вялікія справы, здзейсненыя ўчора, якія адкрываюць нас на сёння”, – сказаў іерарх.
Біскуп падкрэсліў, што прысутнасць тут у гэты юбілей столькіх вернікаў і малітоўная сустрэча дазваляюць дакрануцца і зачэрпнуць гэтай “чароўнай Божай і астравецкай цішыні”. “Мы можам у гэтай святыні і ў гэтым месцы адчуць моц Духа. Мы можам перажыць гэтую атмасферу супакою, якая спрыяе сустрэчы з Богам, спрыяе магчымасці адкрыцця на Бога і на чалавека”, – дадаў іерарх.
Будаваць святыню ў душах наступнага пакалення
Падчас Эўхарыстыі адбылася ружанцовая працэсія з дарамі, у якой удзельнічалі прадстаўнікі розных арганізацый і навучальных устаноў Астравеччыны. Працаўнікі электрасетак, настаўнікі і дзеці, медыкі і фармацэўты, сужэнцы, якія адзначаюць юбілей свайго шлюбу, прадстаўнікі жыллёва-камунальнай гаспадаркі, сельскай гаспадаркі, бацькі астравецкіх святароў дзякавалі за юбілей парафіі, за апеку і заступніцтва святых Космы і Дам’яна, за жыццё і дзівосную гісторыю свайго касцёла, просячы аб шчодрасці Божых ласкаў на кожны дзень будучыні.
Урачыстасць завяршылася эўхарыстычнай працэсіяй вакол касцёла, пасля чаго парафіяне выказалі ўдзячнасць за гэтую цудоўную і гістарычную для іх і Астраўца святыню.
“Будзем старацца, як і 550 гадоў таму, каб наш касцёл квітнеў і развіваўся. Будзем любіць Бога і ўмацоўвацца духоўна. Спадзяёмся, што з Яго дапамогай збудуем святыню і ў душах наступнага пакалення”, – адзначыў Юзаф Грамбоўскі, прадстаўнік парафіяльнай супольнасці.
Mенавіта такое пасланне і пажаданне пакінуў вернікам гэтай супольнасці таксама біскуп Аляксандр Кашкевіч. Дзякуючы за клопат аб касцёле асабліва пробашчу, сёстрам законным і ўсім вернікам, іерарх пажадаў далей будаваць жывы Касцёл і сваім штодзённым жыццём, заснаваным на Евангеллі Езуса Хрыста, запісваць чарговыя прыгожыя раздзелы ў гісторыю астравецкай парафіі і ўсёй Астравеччыны.
Kс. Юрый Марціновіч
Фота: Віталій Спірыдон
