16 чэрвеня ў Смаргоні Салезіянская сям’я Беларусі адзначыла дзень адзінства. На святкаванне прыбыло шмат людзей з усёй краіны: святары салезіяне, сёстры салезіянкі, салезіяне супрацоўнікі, аніматары, дзеці, моладзь і шматлікія вернікі з усіх салезіянскіх пляцовак. Ганаровымі гасцямі на свяце сталі Апостальскі Нунцый у Беларусі арцыбіскуп Габар Пінтэр, біскуп Аляксандр Яшэўскі SDB, а таксама ксёндз Юзаф Занеўскі SDB, які распачынаў салезіянскую справу ў Беларусі і які ў гэтыя дні святкаваў саракавую гадавіну святарства.
На пачатку свята пад гукі аркестра гасцей прывітала моладзь у нацыянальных строях і касалапы мішка, які з’яўляецца сімвалам Смаргоні.
Традыцыйна дзень адзінства Салезіянская сям’я адзначае ў дзень нараджэння рэгіянальнага настаяцеля. У Беларусі гэтую пасаду займае кс. Віктар Гайдукевіч SDB, які адзначае свой дзень нараджэння 21 чэрвеня. Таму для салезіянаў Беларусі ўжо стала добрай традыцыяй збірацца ў першы месяц лета ў адным з месцаў сваёй прысутнасці. Пяць год таму ў Беларусі ўпершыню адзначалі гэтае свята ў Смаргоні, у бягучым годзе дзень адзінства вярнуўся ў гэты горад.
Урачыстую св. Імшу ўзначаліў Апостальскі Нунцый арцыбіскуп Габар Пінтэр, а гамілію да прысутных прамовіў біскуп Аляксандр Яшэўскі SDB. У сваёй прамове іерарх разважаў над асобай Езуса Добрага Пастыра. “Як гаворыць Евангелле, над якім сёння разважаем, сапраўдны пастыр аддае жыццё сваё за авечак (пар. Ян 0,15).
Езус не толькі аддаў за нас жыццё, але зрабіў тымі, хто мае дачыненне да Збаўлення. Менавіта збаўленне тых, каго палюбіў і для каго ўцелавіўся Сын Божы, было мэтай прыйсця Хрыста ў гэты свет. Калі кожны з нас жадае наследаваць Хрыста, як Добрага Пастыра, няхай з усіх сіл стараецца палюбіць чалавека так, каб аддаць сваё жыццё за яго”, - адзначыў біскуп.
Напрыканцы казання біскуп узгадаў шаноўных юбіляраў, кс. Віктара і кс. Юзафа, спыніўшыся на асобе кожнага з іх і ўзгадаўшы этапы іх святарскага служэння, а таксама пажадаўшы ім далей наследаваць прыклад Езуса.
“Кс. Юзаф распачынаў сваё служэнне ў няпростыя і небяспечныя для святара часы, калі супраць веры змагаліся, забаранялі цэлебраваць св. Імшу, пагражалі. Нягледзячы на ўсе перашкоды, наш юбіляр бясстрашна працаваў на ніве Пана: рыхтаваў дзяцей да Першай святой Камуніі, праводзіў катэхэзы, стварыў у Жупранах сапраўдны аазіс веры, а таксама нястомна цэлебраваў св. Імшы ў навакольных вёсках”, - распавёў іерарх.
“Пан выбраў кс. Віктара, простага, але ў той самы час чалавека са шматлікімі каштоўнасцямі і здольнасцямі. Мудрасць, якая праяўляе Божую прысутнасць і ўказвае на першынства Бога; салезіянскую радасць, якую можа раздзяляць з іншымі і такім чынам сеяць зерне надзеі; адкрытасць, якая дазваляе першаму выцягнуць руку, каб дапамагчы; сардэчнасць, з якой вітаецца з усімі, асабліва з моладдзю; веру ў ласку Божую і чалавечую дабрыню; патрабавальнасць айца і настаўніка; сумленнасць ў апостальскім і братэрскім служэнні”,- падкрэсліў біскуп.
Напрыканцы св. Імшы арцыбіскуп Габар Пінтэр перадаў кс. Віктару і кс. Юзафу асабістыя віншаванні ад Папы Францішка і пастырскае бласлаўленне ад Святога Айца.
Пасля рэгіянальны настаяцель салезіянскага таварыства ў Беларусі ад імя ўсёй Салезіянскай сям’і звярнуўся са словамі падзякі і віншавання да кс. Юзафа: “На нашых землях Вы ўваскрасілі салезіянскі дух, Вы нас уваскрасілі, як добры гаспадар, Вы падрыхтавалі зямлю, засеяную зернем. Толькі Бог ведае, як цяжка давалася наша Беларуская цаліна, знішчаная сонцам атэістычнай ідэалогіі і абыякавасцю душы, як цяжка было выкараніць з людскіх сэрцаў боязь, амаральнасць, пустату. Вы пакінулі на Беларусі прыгожую, дагледжаную зямлю. Мы, як маладое пакаленне, даглядаем яе, а плёны будуць збіраць маладзейшыя за нас, у гэта мы свята верым! Мы верым, што Вашая праца не будзе змарнавана, што прыйдуць новыя сабраты і ўрэшце на Беларускай зямлі заквітнее цудоўны салезіянскі сад. Вы - наша легенда, наш прыклад. Дзякуй за Вашую адвагу стаць святаром у такі нялёгкі час”.
Павіншаваў юбіляраў таксама і старшыня Смаргонскага райвыканкама Харужык Генадзь Васільевіч. Ён адзначыў, што раённыя ўлады высока цэняць супрацоўніцтва з Касцёлам і працу салезіянаў у справе выхавання моладзі.
Пасля ўсіх віншаванняў прысутныя накіраваліся ў араторый, дзе адбыўся абед і працяг святочнай праграмы, падрыхтаваны салезіянамі са Смаргоні пад кіраўніцтвам пробашча парафіі св. Міхала Арханёла кс. Алега Жураўскага SDB.
Паводле sdb.by
