22 мая святары-аднакурснікі, якія разам скончылі вучобу ў Вышэйшай духоўнай семінарыі ў Гродне 18 год таму, сабраліся разам на Віцебшчыне. Некаторыя з іх ўпершыню наведалі Глыбокае і парафіяльны касцёл.
Сярод выпускнікоў:
- біскуп Алег Буткевіч, ардынарый Віцебскі;
- кс. пралат Аляксандр Рагіня, часовы павераны Апостальскай нунцыятуры ў Рэспубліцы Чад;
- кс. канонік Аляксандр Мацкевіч, канцлер Гродзенскай курыі;
- кс. канонік Антоні Грэмза, душпастыр моладзі Гродзенскай дыяцэзіі, рэктар Пабрыгіцкага касцела ў Гродне;
- кс. Андрэй Зайко, супрацоўнік Гродзенскага касцёльнага суда;
- кс. Дзмітрый Урбановіч, пробашч парафіі Святога Яна Паўла ІІ у Смаргоні (Гродзенская дыяцэзія);
- кс. Павел Калеснік, пробашч парафіі Найсвяцейшай Тройцы ў Жодзішках (Гродзенская дыяцэзія);
- кс. канонік Віктар Мыслюк, пробашч парафіі Св. Яна Хрысціцеля ў Воўпе (Гродзенская дыяцэзія);
- кс. Уладзімір Русак, пробашч парафіі Нараджэння Найсвяцейшай Панны Марыі ў Лебедзеве (Мінска-Магілёўская архідыяцэзія)
- кс. Юрый Хіневіч, пробашч парафіі Узвышэння Cвятога Крыжа ў Брэсце (Пінская дыяцэзія)
- кс. Віктар Шчучка, пробашч парафіі Святога Андрэя Апостала ў Крывічах (Мінска-Магілёўская архідыяцэзія);
- кс. Марат Казлоўскі, пробашч парафіі Святой Ганны ў Мосары (Віцебская дыяцэзія);
- кс. Раман Мурзіч, пробашч парафіі Імя Найсвяцейшай Панны Марыі ў Параф’янаве (Віцебская дыяцэзія);
- кс. канонік Пётр Шарко, пробашч парафіі Божага Цела ў Нясвіжы (Мінска-Магілёўская архідыяцэзія);
- кс. Мікалай Ціхановіч, пробашч парафіі Святой Тройцы ў Глыбокім (Віцебская дыяцэзія);
- кс. Аляксандр Амяльчэня, дырэктар Беларускай рэдакцыі Ватыканскага радыё;
- кс. Сяргей Альхімёнак, пробашч парафіі Маці Божай Лурдскай у Санкт-Пецярбурзе.
На жаль, не ўвесь выпуск змог сабрацца разам, бо некаторыя святары працуюць за межамі нашай краіны.
Св. Імшу ўзначаліў біскуп Алег Буткевіч. Іерарх на самым пачатку падкрэсліў: “Сённяшняя малітва – гэта выраз удзячнасці Пану Богу за дар паклікання, за яго рэалізацыю. Кожны з нас сёння дзякуе за тых людзей, з якіх узятыя і да якіх пасланыя, бо вашая малітва напачатку становіцца крыніцай паклікання, а пазней – падтрымкай святара ў служэнні.”
“Сёння тут адбываецца пэўная ілюстрацыя таго, што перажывалі ў нядзелю Спаслання Святога Духа. Мы, як некалі апосталы, атрымалі моц Духа Святога і, разышоўшыся па ўсім свеце, абвяшчаем Евангелле. Цяпер сабраліся тут, каб падзякаваць Богу за дар паклікання. І напэўна кожны з вас мае гэтую нагоду для ўдзячнасці Госпаду. І разам з Марыяй хочам паўтараць яе словы “Вялікія рэчы ўчыніў мне Усемагутны””, — адзначыў Віцебскі ардынарый.
На заканчэнне Эўхарыстыі прадстаўнікі парафіі скіравалі словы віншавання і падзякі за дар паклікання кожнага святара, а таксама за магчымасць глыбоцкім вернікам разам маліцца. Прагучала думка, што гэтая сустрэча адбываецца ў Глыбокім упершыню, але не ў апошні раз. А каб спатканне стала незабыўнай хоць на некаторы час, кожны “выпускнік-2000” атрымаў памятны падарунак – глыбоцкую згушчонку.
“Добра, што ёсць сябры! Ёсць нагоды сустрэцца з тымі, хто блізкі сэрцу”, — адзначыў біскуп Алег і падзякаваў пробашчу парафіі кс. Мікалаю за прапанову і магчымасць гэтай сустрэчы менавіта ў Глыбокім.
Пасля св. Імшы святары паглядзелі выставу, прысвечаную гісторыі Беразвечча, якая дзейнічае ў касцёле.
Паводле Catholicnews.by
