20 мая, ва ўрачыстасць Спаслання Духа Святога, у катэдральным касцёле св. Францішка Ксаверыя ў Гродне адбыўся сакрамэнт канфірмацыі. Сакрамэнт удзяліў біскуп Гродзенскі Аляксандр Кашкевіч.
Сакрамэнт хрысціянскай сталасці прынялі 80 чалавек – як маладыя, так і старэйшыя вернікі.
Падчас Эўхарыстыі іерарх маліўся асаблівым чынам за кандыдатаў да канфірмацыі, каб у гэты выключны дзень Дух Святы напоўніў іх сэрцы сваімі дарамі, якія робяць чалавека здольным быць адважным хрысціянінам.
Гамілію прамовіў канцлер Гродзенскай курыі кс. канонік Аляксандр Мацкевіч, заклікаўшы асабліва маладых людзей да мужнага вызнавання веры і жыцця згоднага з яе прынцыпамі.
На заканчэнне Імшы тыя, хто прыняў сакрамэнт, выказалі ўдзячнасць усім, хто рыхтаваў іх праз катэхізацыю да гэтай важнай падзеі ў іх жыцці, а таксама падзякавалі біскупу за яго ўдзяленне.
Taмаш Мікалайчык, семінарыст
