1 красавіка ранішняй святую Імшу ва ўрачыстасць Уваскрасення Пана ў касцёле Узвышэння Святога Крыжа ў Лідзе ўзначаліў дапаможны біскуп Гродзенскай дыяцэзіі Юзаф Станеўскі.
Шматлікія вернікі, сабраныя на Эўхарыстыі, рушылі найперш у рэзурэкцыйнай працэсіі, каб трыумфаваць перамогу жыцця над смерцю. На пачатку працэсіі неслі фігуру Уваскрослага Хрыста, падперазаную чырвонай стулай, і пасхал, якія з’яўляюцца знешнімі знакамі распачатага Велікоднага перыяду.
У гаміліі біскуп Юзаф Станеўкі адзначыў, што ўваскрасенне Хрыста з’яўляецца святам жыцця і перамогі над смерцю і над грахом, якое адкрывае перспектывы новага жыцця і новай надзеі.
Іерарх звярнуў увагу, што сабраныя на Эўхарыстычнай літургіі нанова перажываюць памяць Уваскрасення Пана і распазнаюць Яго ў ламанні хлеба.
Біскуп пажадаў, каб велікодныя святы ўносілі ў жыццё кожнага чалавека мір і сапраўдную радасць ад сустрэчы з Уваскрослым Панам.
Кс. Юрый Марціновіч
