Нечаканай і радаснай падзеяй для вернікаў парафіі Святой Сям'і ў Лідзе быў прыезд дапаможнага біскупа Гродзенскай дыяцэзіі Юзафа Станеўскага на благаслаўленне страў на велікодны стол. Іерарх наведаў парафію ў Вялікую суботу, 31 сакавіка.
Сустрэлі біскупа святары, семінарысты і міністранты парафіі.
У сваім слове іерарх адзначыў, што стол, за які мы будзем сядаць разам са сваімі сем'ямі ў Велікодную нядзелю, павінен быць падобны на літургічны стол, які называецца алтаром, дзе ўсе людзі адзіныя і роўныя перад Богам.
Потым біскуп благаславіў велікодныя стравы, правёў адарацыю і памаліўся разам з парафіянамі дзясяткай Ружанца.
У канцы іерарх павіншаваў усіх прысутных з надыходзячым святам і пажадаў захоўваць у сэрцы святло і любоў, якім адорвае нас Уваскрослы Езус.
Вікторыя Бурч
