30 сакавіка ў катэдральным касцёле ў Гродне адбылася літургія Мукі Пана – набажэнства Вялікай пятніцы, у якім асабліва ўшаноўваецца дрэва Крыжа.
Вялікая пятніца – адзіны дзень у літургічным годзе, калі ў святынях не цэлебруецца св. Імша. Літургія складаецца з трох частак: літургіі слова, адарацыі крыжа і св. Камуніі.
Набажэнства па традыцыі распачынаецца з таго, што ксёндз кладзецца крыжам і пэўны час моліцца ў маўчанні разам з вернікамі, якія стаяць на каленях. Цэнтральнай часткай літургіі Мукі Пана з’яўляецца адарацыя святога Крыжа, на якім здзейснілася збаўленне свету. Яна распачынаецца ўрачыстым адкрыццём распяцця ад фіялетавай тканіны, якой было закрыта з V Нядзелі Вялікага посту. Пасля духавенства і ўсе вернiкi могуць падысці да крыжа і пацалаваць яго, аддаўшы пашану Збаўцы.
Ксёндз пробашч, Ян Кучынскі, задаў пытанне вернікам:"Каго шукаем ў жыцці? Каб знайсці адказ, трэба глядзець на крыж і шукаць там адгадку".
"Езус памёр на крыжы за ўсіх нас, Ён узяў на сябе ганебную смерць дзеля нашага збаўлення, даў нам магчымасць тым самым пазнаць міласць і любоў нашага нябеснага Айца", - дадаў святар.
Апошнім літургічным актам гэтага дня з’яўляецца перанясенне Найсвяцейшага Сакраманту ў прыгожа аздобленую сімвалічную грабніцу, дзе ён будзе адараваны да пачатку Пасхальнай вігіліі.
Вольга Сяліцкая
