Перад святамі Божага Нараджэння дзяцей у Смаргонскім дзіцячым сацыяльным прытулку наведалі прадстаўнікі салезіянскай сям’і моладзевага цэнтра парафіі Св. Міхала Арханёла – семінарыст Марк Найдзіч з моладдзю.
Няўпэўненыя погляды выхаванцаў вельмі хутка ператварыліся ў радасныя і адкрытыя, дзяўчынкам і хлопчыкам спачатку распавялі, а потым сумесна з імі зрабілі бэтлеемскую стайню, пазней усе захапіліся агульнымі гульнямі і забавамі.
Акрамя таго, выхаванцаў неаднаразова запрашалі на святы ў дзіцячы араторый пры парафіі ў Смаргоні, якія арганізоўвалі сястра Вераніка і сястра Ірына.
Таксама ў гэтым месяцы пробашч парафіі кс. Алег Жураўскі перадаў развіваючыя цацкі і гульні, якія неабходныя для працы Смаргонскага дзіцячага сацыяльнага прытулку.
“Мы ўпэўнены і ў далейшым супрацоўніцтве, дзякуем за чулае да нас стаўленне, віншуем усіх з урачыстасцю Нараджэння Езуса Хрыста, жадаем моцнага здароўя, радасці, добрых людзей побач, поспехаў ва ўсіх справах, душэўнага супакою і нястомнай радасці на кожны дзень”, - адзначае дырэктар дзіцячага сацыяльнага прытулку Ларыса Татарынава.
JM
