14 снежня адбылася аплатковая сустрэча моладзі з Беларусі і Украіны, якая вучыцца ў Любліне (Польшча). У пераважнай большасці гэта былі студэнты Люблінскага каталіцкага ўніверсітэта Яна Паўла ІІ.
Сустрэча пачалася святой Імшой на ўкраінскай мове. Гамілію на беларускай мове падчас Імшы прамовіў дапаможны біскуп Гродзенскай дыяцэзіі Юзаф Станеўскі, які ў 1996-1999 гадах вывучаў у Люблінскім каталіцкім універсітэце кананічнае права.
Звяртаючыся да моладзі, біскуп распавёў пра праблемы сучаснасці, з якімі сутыкаецца маладое пакаленне. Заахвочваючы да пільнасці ў навуцы, іерарх звярнуў увагу на тое, што нельга ніколі забываць пра сваё духоўнае жыццё. «Вашы народы чакаюць вас, каб вы там сведчылі пра Хрыста», — падкрэсліў біскуп Юзаф Станеўскі.
Узгадваючы пра цяжкую сітуацыю, у якой апынулася Украіна, іерарх заахвоціў да малітвы, якая вызваляе ад нянавісці.
Пасля Імшы адбылося дзяленне аплаткай і культурная праграма.
Паводле Catholic.by