На навагрудскія ўрачыстасці ў гонар назарэтанак-мучаніц упершыню прыйшла пешая пілігрымка з Ліды

На ўрачыстасці ў Навагрудку ў гонар благаслаўлёных сясцёр назарэтанак, якія загінулі мучаніцкай смерцю ў час Другой сусветнай вайны, сёлета ўпершыню прыйшла пешая пілігрымка з Ліды.

Пілігрымка, якая адбылася ў апошнія дні ліпеня, стала значнай падзеяй у гісторыі лідскай парафіі св. Юзафа, Рамесніка, і благаслаўлёных назарэтанак-мучаніц. У ёй узялі ўдзел вернікі не толькі гэтай парафіі, але і іншых парафій Ліды, а таксама з Гродна, Радуні і Шчучына.

Пілігрымка пачалася малітвай на Эўхарыстыі разам з каад’ютарам Гродзенскай дыяцэзіі біскупам Уладзімірам Гуляем. Іерарх заахвоціў вернікаў да малітоўнага пілігрымавання і ўдзяліў ім благаслаўленне. Некаторы час біскуп сам прайшоў у пілігрымцы. Разам з ім пілігрымы пераадолелі апошнюю частку шляху, набліжаючыся да месца мучаніцкай смерці назарэтанак, каб дзякаваць Богу за дар іх ахвяры.

Адметнай падзеяй у пілігрымцы былі духоўныя канферэнцыі, якія прамаўляў да ўдзельнікаў намінат Андрэй Зноска, прызначаны дапаможным біскупам Пінскай дыяцэзіі. Ён распавёў пілігрымам, што Навагрудак і благаслаўлёныя назарэтанкі вельмі блізкія яму, паколькі з самага дзяцінства ён наведваў навагрудскую Фару і разам з бацькамі маліўся на месцы пахавання мучаніц. Таксама біскуп-намінат адзначыў, што святасць патрабуе вялікіх намаганняў.

Асноўнай тэмай гэтых “рэкалекцый у дарозе” былі навагрудскія назарэтанкі і іх мучаніцкая смерць дзеля жыцця іншых. Пілігрымы адзначаюць, што прыклад адкрытасці назарэтанак-мучаніц і іх клопату пра бліжняга даў ім магчымасць усвядоміць моц супольнасці Святога Касцёла. Вернікі ўзгадваюць і пра такія моманты пілігрымавання, як малітва і разважанне над Божым словам, новыя знаёмствы і сяброўскія размовы, гасціннасць і дабрыня парафіян з Мінойт і Бярозаўкі разам з іх пробашчам кс. Андрэем Радзевічам, спевы і танцы.

Удзельнікі пілігрымкі кажуць, што, нягледзячы на цяжкасці і стомленасць, гэта была добрая магчымасць адчуць сябе часткай збаўчай супольнасці святых – супольнасці, дзе ёсць благаслаўлёныя сёстры-мучаніцы, якія моляцца за людзей перад абліччам Бога, і ёсць яны самі, якія ідуць шляхам веры і імкнення да святасці ў штодзённасці.

Вернікі спадзяюцца, што гэтая пілігрымка стане традыцыяй, таму ўжо цяпер запрашаюць усіх ахвотных далучыцца да яе ў наступным годзе.

Прэс-служба Гродзенскай дыяцэзіі

Фота: Людміла Віхаценка