30 студзеня малодшыя вернікі парафіі Маці Божай Анёльскай у Гродне (францішканская), іх бацькі і госці сабраліся каля стаенкі з Дзіцяткам Езусам, каб разам спяваць калядкі і радавацца талентам адзін аднаго, якія падарыў Бог.
Час зараз не вельмі радасны, але дзеці зрабілі свой велізарны ўнёсак, каб дарослыя хаця б крыху маглі адысці ад цяжкасцяў і ўсміхнуцца.
У праграме “канцэрту для Езуса” прынялі ўдзел парафіяльны хор “Містэрыум”, вучні 1 і 2 катэхетычных класаў і самыя маленькія вучні нядзельнай школы.
Вечар распачаў а. Аляксей Юхневіч OFMConv словам прывітання і сумеснай малітвай з благаслаўленнем Дзіцяткі Езуса. Пасля прагучалі любімыя калядкі вернікаў. Кожны мог уключыцца ў праграму.
Пасля канцэрту кожны мог асабіста развітацца з Дзіцяткам Езусам. Дзеці атрымалі маленькія салодкія падарункі.
Верагодна, кожны з удзельнікаў таксама атрымаў падарунак – духоўны, вельмі важны і каштоўны: пацвярджэнне, што Езус заўсёды побач з намі.
