2 лютага Паўсюдны Касцёл адзначае свята Ахвяравання Пана. Такім чынам увесь Божы народ нанова перажывае тое, што здарылася ў Ерузалемскай святыні: Марыя разам з Юзафам ахвяравалі Дзіцятка Езуса Богу Айцу, а Сімяон абвясціў, што нованароджаны Сын Божы – Святло свету і Збаўленне народаў.
У 1997 г. Ян Павел ІІ устанавіў у гэтае свята Сусветны дзень кансэкраванага жыцця, ствараючы нагоду для глыбейшага разважання ўсяго Касцёла над дарам жыцця, прысвечанага Богу. Найсвяцейшая Маці ахвяруе Пану найвялікшы дар, які атрымала, – Сына, Езуса Хрыста, а тым самым прыносіць у ахвяру сябе. Падобную ахвяру, у выглядзе сябе саміх у любові да Хрыста, прыносяць кансэкраваныя асобы.
У сувязі з тым, што з кожным годам памяншаецца колькасць пакліканняў да кансэкраванага жыцця, дзеці з парафіі св. Вацлава ў Ваўкавыску распачалі малітву ў інтэнцыі новых святарскіх і манаскіх пакліканняў у нашай краіне. Час Адвэнту яны прысвяцілі малітве аб пакліканнях да святарства і манаскага жыцця ў Беларусі, каб Бог паслаў працаўнікоў на сваё жніво і каб у нас ніколі не было адсутнасці тых, хто абвяшчае Евангелле і ўдзяляе сакрамэнты.
На гэты раз дзеці зрабілі каля сваёй святыні ружанец са снегу і кожнага, хто глядзіць на яго, заахвочваюць да малітвы аб святасці жыцця і новых пакліканнях.
Няхай Марыя выпрасіць у свайго Сына шмат працаўнікоў на ніве Панскай, каб на нашай зямлі ніколі не было недахопу ў тых, хто будзе рупліва абвяшчаць Слова Жыцця, і каб просьба дзяцей была выслухана Богам.
Кс. Юрый Марціновіч
