Сёлетнія Каляды мы сустракаем у вельмі складаны час. Паўсюль эпідэмія, і людзі, перайшоўшы на дыстанцыйныя адносіны, перайшлі таксама ў жыццё, пазначанае колерамі боязі, бязраднасці і адчаю. Пандэмія – вялікае выпрабаванне. 

З-за эпідэміі адменены шматлікія масавыя мерапрыемствы, таксама і касцёльныя. Мала дзе на ўрачыстасць Божага Нараджэння можна ўбачыць традыцыйныя калядныя пастаноўкі, якія нагадваюць вернікам пра падзеі, калі дзве тысячы гадоў таму нарадзіўся Езус.

Моладзь з салезіянскага араторыя ў Смаргоні вырашыла паспрабаваць усё ж рабіць калядны спектакль, але ў іншым, больш бяспечным фармаце. Акторы падрыхтавалі сцэнку без слоў і ў масках. Таксама, каб нікога не ўводзіць у небяспеку заражэння COVID-19, яны вырашылі не паказваць прадстаўленне гледачам ужывую, а зняць яго на відэа. Гэта дазволіць большай колькасці гледачоў убачыць творчую працу, каб невялікі спектакль дапамог увайсці ў атмасферу бэтлеемскай ночы, якая змяніла свет.