Паважаныя ўдзельнікі хору “Cantate Domino” на чале з дырыжорам Генрыхам Іванавічам!

22 лістапада, ва ўспамін св. Цэцыліі, панны і мучаніцы, апякункі касцёльнай музыкі, ад усяго сэрца віншуем гродзенскі хор “Cantate Domino” на чале з дырыжорам Генрыхам Іванавічам Давідовічам!
Няхай Бог, цудоўны Творца неба і зямлі, які адарыў людзей ласкай бачыць прыгожае, адчуваць узнёслае і ўвасабляць свае пачуцці ў творах мастацтва, напоўніць вас, паважаныя харысты, любоўю і радасцю, каб сваім чароўным спевам кранаць сэрцы людзей, заклікаючы да глыбокай малітвы і адновы жыцця.

Няхай святая Маці Божая захоўвае вас у адзінстве і вернасці свайму пакліканню: праслаўленню Бога праз духоўны спеў. А св. Цэцылія няхай апякуецца вашымі галасамі і выпрошвае патрэбныя ласкі на гэтай шляхетнай дарозе.
Асаблівыя словы пашаны кіруем дырыжору Генрыху Іванавічу, які нястомна працуе над развіццём і артыстычным удасканаленнем калектыву, а таксама па-бацькоўску апякуецца кожным харыстам. Ад усяго сэрца жадаем яму Божага благаслаўлення, здароўя і новых творчых памкненняў. Няхай Святы Дух кіруе Вамі і напаўняе Сваёй ласкай і сілай!

З удзячнасцю вернікі Гродзенскай дыяцэзіі

Па традыцыі дзень 22 лістапада харысты, для якіх музычная дзейнасць складае вельмі важную частку жыцця, адзначаюць святочным канцэртам, які заўсёды збірае разам шматлікіх слухачоў – аматараў касцёльнай музыкі і прыхільнікаў творчасці хору.

Аднак гэты год асаблівы: пандэмія каранавірусу змяніла жыццё кожнага чалавека, закранула амаль кожную сям’ю. Таму ў сувязі са складанай эпідэміялагічнай сітуацыяй з клопатам пра здароўе харыстаў і вернікаў сёлетні святочны канцэрт адмяняецца.

Маем надзею, что ў хуткім часе мы зноў зможам пачуць цудоўны голас хору “Cantate Domino”, які ў сферы касцёльнай музыкі і спеву з’яўляецца своеасаблівай візітоўкай Гродзенскай дыяцэзіі, добра вядомай, распазнавальнай і любімай слухачамі.